Dia 3 di december Palmera Quality Products ta cumpli 60 aña formando parti di economia di Aruba. E compania conoci antes como Rum Palmera a wordo funda na aña 1965 pa Yan Tai Wong y Jan Eman, tur dos den feliz memoria. E prome establecimento tabata den Caya Grandi caminda antes La Linda tabata situa.
Na aña 2016 a cambia e nomber y logo di Rum Palmera pa Palmera Quality Products (PQP), ya cu atrabes di añanan e compania a amplia su liña di productonan. Actualmente Palmera Quality Products ta produci un total di 5 liña di producto: Rum Palmera, Palmera Spirits, Palmera Liqueur, Palm Mix y Sabrosa, tur di diferente sabor. E productonan ta wordo produci cu e sabor netamente di Aruba ‘A taste of Aruba’. PQP aworaki ta produci un total di 92 producto localmente, alabes ta importa varios producto alcoholico y no alcoholico renombra mundialmente. Como compania cu ta bende productonan di alcohol PQP su lema ta pa Bebe Responsabel.
Den cuadro di 60 aniversario di Palmera Quality Products a scohe pa otorga un donacion na Fundacion Cas Marie cu ta e Centro di Demencia cu ta dedica na cuido di personanan cu tin demencia. Alabes Fundacion Cas Marie ta duna informacion y brinda famianan sosten cu personanan cu sindroma di demencia. E decision aki ta bini for di un experiencia personal y cerca di e famia fundado, cu ta consciente di importancia di e cuido, guia pa e personanan cu ta enfrenta retonan cu demencia por biba un bida digno. Na mesun momento e contribucion na Fundacion Cas Marie ta un manera di yuda hopi otro famia y tambe nos comunidad en general.
E donacion ta consisti di varios articulo di importancia pa Fundacion Cas Marie y nan bishitantenan, manera computer, schommelstoel, hydroponic tower, pedal trainers, mesa di domino y materialnan pa decora un green coffee corner. E articulonan aki ta di suma importancia pa e fundacion pa haci entre otro trabounan administrativo, pa suministra alimento sostenibel pa e bishitantenan y tambe tin articulo cu ta promove e bishitante su simulacion cognitativo, interaccion social y ta yuda cu nan movecion y mobilidad, Esakinan ta areanan di importancia pa e bishitantenan por keda activo y stimula nan mente pa asina nan por sigui disfruta di un bon calidad di bida.
Gerencia di Palmera Quality Products hunto cu algun miembro di personal a haci entrega di e articulonan na Fundacion Cas Marie den presencia di Presidente di Fundacion Cas Marie, sra. Yvonne Escalona, Coordinador Welzijn sra. Jeanine Nicolaas-Leijdens y Coordinador Actividad sr. Jean Carlo Trinidad. PQP ta desea nan hopi exito pa sigui cu nan bon trabou pa cu su bishitantenan, nan famianan y comunidad di Aruba en general. Durante mas cu 60 aña, Palmera Quality Products a contribui na economia di Aruba y ta spera di por continua cu esaki pa hopi aña mas.
