Nos ta den e temporada mas bunita, cu e anja ta ofrece e temporada den cual nos ta celebra nacemento di nos Rey, Senjor y Salbador kende ta Cristo Hesus.
Conoci den boca di pueblo como Pasco di nacemento.
Un celebracion asina grandi cu ta cambia ambiente den tur cas y den tur famia,
Pasobra cas ta wordo drecha, pasobra Pasco ta na caminda,
Hende ta cumpra panja nobo pasobra Pasco ta na caminda,
Hende ta biaha distancia largo pa asina pasa Pasco hunto cu nan famia,
Cuminda extra ta wordo cumpra, Pasco ta na caminda,
Tur esaki ta sosode pasobra tur curason ta alegra ora nan recorda cu nos Rey a nace.
Aunke awendia hopi ta bini cu e pensamento cu e fecha di Su nacemento no ta corecto, awel esey no ta importa, pasobra e evidencia di Su nacemento ta grandi y poderoso, y sobrenatural, pasobra locual cu a pasa pa Cristo Hesus por a bini na mundo ta algo hopi, hopi, grandi cu mente humano no por describi.
Na prome lugar Dios a scohe dos persona, Humilde, yena cu Amor, Obediencia y Madurez pa asina cumpli cu e encargo cu Dios a duna na nan.
Maria a acepta locual e angel a bise, y Hose aunke e noticia cu e a hanja cu Maria tabata na estado mientras cu nan tin plan di cas, y e yiu no tabata di dje, a somete su mes na Dios, y despues cu e Angel a papia cune den su sonjo a tuma e encargo di ta e padraso di mas grandi na mundo.
Nan dos a carga un secreto cu por a causa nan bida, pero na prome lugar tambe lo atrae gran berguensa, pasobra con nan lo por a splica den e tempo ey locual a tuma lugar pa medio di Spirito Santo di Dios.
Hasta awor den e tempo cu nos ta bibando aki, hende lo chercha, prensa lo a haci bofon, hopi media lo a traha caricatura di cos nan di Dios. Pasobra te ainda tin hende cu no ta kere den e obra sobrenatural di Dios.
Mientras cu e pueblo di Israel tabata spera un hende cu lo libra nan for di e yugo pisa di e Romanonan . Dios a manda su Yiu pa salba Su pueblo di nan picanan. Pesey hopi no a compronde y no a ricibie y te awe ta sperando.
Si nos lesa nos Bijbel bon e nacemento di Hesus a wordo bisa pa Dios, for di den Genesis 3:15, sigi pa profecia di Isaias mas cu 700 anja prome cu Hesus a nace den Isaias 7:4, despues confirma den Mikeas 5:2 cu Hesus lo nace na Bethlehem,y nos tur ta mira locual ta para scirbi den Mateo 1:20-24.
Ta un fiesta grandi tin pa mundo henter cu ta kere den Cristo Hesus y ta reconoce Ken E ta pa nos tur .
E bishita di Maria na Elisabeth ta otro gran confirmacion di Dios, cu Maria tabata na estado, pasobra e no por a bay ningun dokter, pasobra si un hende a hanja sa si e tabata na estado prome cu e a casa, problema grandi lo a bini, pero pa medio di Spirito Santo di Dios, a wordo revela na Elisabeth cu Maria tabata na estado y cu ta mama di Su Senjor a bin haci bishita.
Laga nos no lubida e cantica cu Maria a canta den Lucas 1; 46-56.
E temporada aki mester ta un temporada pa gosa den pas y tur trankilad hunto cu nos Famia.
Ban celebra e nacemento di Hesus.
Sinceramente, Pastor Marcel Balootje
