Corte Superior di Husticia a dicta sentencia contra e sospechoso I.M.P. den e caso penal Last Call. E procedimento a trata unicamente e parti di castigo.
I.M.P. a wordo condena na 2023 pa homicidio di un mucha muher di 19 aña, cometi riba 4 di juni 2021. Na 2024, Hoge Raad a anula e decision aki di Corte Superior, pero solamente pa loke ta e parti di castigo. Esey a nifica cu Corte Superior mester a dicidi di nobo tocante e castigo y e medida cu lo wordo impone riba e sospechoso.
Awe Corte Superior a condena e sospechoso pa un castigo incondicional di6 aña di prison y e imposicion di e medida di TBS cu condicionnan. Un di e condicionnan ta cu e ta wordo interna den un Clinica Forensico Psiquiatrico, sigui pa un tratamiento ambulante. Tur esey mester bay bao supervision di Reclassering.
Castigo di prision so no ta suficiente den e caso aki. Tratamento forensico specialisa ta necesario pa preveni cu despues di cumpli su castigo, e sospechoso bolbe forma un peliger pa sociedad. Cu e sentencia aki, sociedad ta wordo proteha contra e riesgo significativo di recidiva cerca e sospechoso aki.
Pa yega na su decision, Corte Superior a wak e gravedad di e hechonan castigabel y a tene cuenta cu e conseho di e expertonan (un psiquiatra y un psicologo) pa aplica Ley pa adulto, aunke e sospechoso tabata menor di edad ainda tempo di e hecho. E expertonan a constata cu por papia di un trastorno cu ta haci cu e sospechoso tin responsabilidad limita pa su actonan, y cu tratamiento ta necesario.
E tratamiento aki por tuma lugar unicamente via e medida di TBS. E expertonan ta considera cu tratamento forzoso no ta necesario tanten cu e sospechoso cumpli cu e condicionnan. Na e momento cu e keda sin cumpli, e medida por wordo cambia den TBS cu internacion forzoso.
Ta pesey mes cu Corte Superior a dicidi pa TBS cu condicion, banda di e castigo di prison maximo posibel cu un duracion di 6 aña.
TBS ta significa terbeschikkingstelling: un medida den cual un persona cu tin un trastorno mental mester wordo trata obligatoriamente, pa evita cu despues di su castigo e sigui di forma un peliger.
