Den Bijbel Genesis 3: 14-16, Dios Tata ta bisa na e colebra satanas: “Lo Mi trece enemistad entre abo y e muher, entre bo descendiente y e descendiente di e muher. E muher cu su descendiente lo trapa riba bo cabes y lo bo lastra bao di su pia.” E muher aki ta Maria, cu a obedece Dios Su mision di salbacion y a acepta di ser mama di E Salbador.“ Maria Su descendiente ta Cristo-Hesus y tur e sigidornan den Cristo-Hesus Su Iglesia Universal. E descendiente di e colebra, ta esnan cu ta den sectanan y cu no ta acepta Maria y cu no ta acepta e Iglesia Universalo di Su Yiu Hesus. Maria a trapa riba e cabes di e colebra, pa medio si Su Yiu Hesus. Bijbel Revelacion 12: 17: “Awor e dragon a rabia contra e muher y el a bay haci guera na e demas yiunan di e muher.” Akinan e diabel tin rabia riba Maria y e diabel ta persigi e yiunan di Maria, den Iglesia di Su Yiu Hesus. Bijbel Lukas 1: 41-43, Maria a bishita Su prima Elisabeth y Elisabeth a keda jena cu Spirito Santo y a bisa: “Di unda mi ta merece, cu Mama di Mi Senjor ta bishita mi?” Akinan Elizabeth ta expresa cu Maria ta Mama di Dios, pasobra Hesus ta E di dos Persona di E Santisima Trinidad, Maria ta Mama di Yiu di Dios. Bijbel Huan 20: 28, akinan Apostel Tomas a bisa Hesus: “Mi Senjor y Mi Dios.” P’esey Maria ta wordo jama, Mama di Dios. Bijbel Huan 19: 25 – 27, aki Hesus na Crus claba, a mira Su Mama y Su Apostel Huan y E’l a bisa: “Muher, ata bo yiu eynan y despues E’l a bisa Huan: Ata bo mama eynan.” Akinan Hesus ta ofrece apostel Huan Su Mama y apostel Huan ta representa e Iglesia Universal di Hesus y aki tambe Hesus kier pa Su Iglesia acepta Maria como nos Mama, pa nos honrel’E, pa nos venerel’E y pa nos stima Mama Maria manera cu Hesus ta stima Su Mama. E palabra muher cu Hesus a expresa, no ta un ofensa, pasobra ta Dios Tata mes a expresa esaki pa medio di Hesus, cu ta e muher den Genesis 3: 14-16, cu lo trapa riba e cabes di e colebra. Bijbel Revelacion 12: 1, ta bisa: “Un senjal grandi a aparece na Cielo: Un muher bisti cu solo, cu luna bao di su pianan y riba su cabes un corona di diesdos strea.” Maria tin e Corona di diesdos Strea bisti y esaki ta simbolisa e oficio Real den Reino di Cielo. Bijbel 1 Reinan 2: 19-20, aki Rey Salomon a laga pone un stoel di trono na man drechi, pa su mama (Batsheba) sinta. E mama a pidi su yiu un fabor y Rey Salomon a contesta: “Mi mama, pidi mi loke bo kier, lo mi no nenga bo.” Den Bijbel Lukas 1: 30-33, e Angel Gabriel a bisa Maria: “Cu Senjor Dios lo duna Hesus e trono di Su antepasado David y te den eternidad lo E ta Rey di descendientenan di Jacob y Su reino lo no tin fin.” Den Bijbel Huan 2: 1-10, Maria a intercede na Su Yiu Hesus, pa e pareha recien casa na Cana, cu binja a caba y Hesus a haci e prome milager, pa medio di Maria. Maria como Reina y Mama, ta sinta na man drechi di Su Yiu Hesus y Maria ta abogada y intercesora pa tur Su yiunan den Iglesia di Su Yiu Hesus.
Conclusion: Corda bon, na ora di nos morto, nos tur tin cu presenta dilanti Tribunal di Hesus Rey di Universo, sinta riba Su Trono y tambe, ta ken lo bo mira sinta riba Su Trono, na man drechi di Hesus, lo bo Maria Reina di Cielo y di Tera, bisti cu Solo, cu luna bao di Su pianan y riba Su Cabes un Corona di diesdos Strea.
Corda bon, loke cu Hesus a bisa na apostel Huan na crus claba, Huan 19: 25-27 : “Huan, ata bo mama.”
Scirbi pa Seferino Tromp
