Aruba Conservation Foundation (ACF) a reconoce Coleganan Campion pa aña 2025, un momento special dedica na honra coleganan cu durante e aña a destaca door di biba y representa e balornan central di e organisacion.
Pa prome biaha, ACF ta introduci e reconocemento “Campion ACF”, unda coleganan a wordo nomina y vota door di nan mesun coleganan, basa riba e cinco balornan fundamental di ACF: Pasion, Integridad, Union, Compromiso y Innovacion. E proceso di votacion a wordo conduci di forma anonimo, reforsando e confiansa y respeto mutuo den e organisacion.
Ganadornan ta lo siguiente:
- Remigio “Rambo” Flanegin – Campion di Pasion 2025
- Jose Lecler – Campion di Integridad 2025
- Solange Charles – Campion di Union 2025
- Jonathan Ras – Campion di Compromiso 2025
- Janine de Mey – Campion di Innovacion 2025
Ademas, Edeline Berg a wordo honra como Colega di Aña 2025, un reconocemento special pa un colega cu a destaca na su dedicacion, colaboracion y impacto positivo riba e ambiente di trabou y cultura di ACF.
ACF ta extende palabra di pabien sincero na tur e campionnan di ACF, y un danki special na tur colega cu a participa den e proceso di nominacion y votacion. Iniciativanan manera esaki ta reafirma e importancia di reconoce, celebra y fortifica e cultura interno cu ta forma e base di e mision di ACF.
Na mes momento ACF ta gradici pueblo henter pa nan sosten durante aña 2025 y ta haci invitacion cordial pa bishita Parke Nacional Arikok durante e aña binidero. Den nomber di naturalesa, danki.
