Un bon desaroyo familiar ta masha importante, un bon relacion den cas entre mayor y mayor y mayor yiu, ta algo cu debidamente tur atencion mester wordo poni na dje.(Efesionan 6:1-4).
Hende grandi a yega di bisa: No sende lus na caya laga cas den scuridad..
Decencia y integridad ta cuminsa na cas, pasobra educacion ta cuminsa na cas.
Tur hende sa y esun cu no sa ainda mester sinja, y reconoce,considera y comprende cu Dios ta na cabes di Famia, y Dios a pone e homber como cabes di e cas , como esun responsabel pa guia e famia den caminda di Dios.
Ora Adam y Eva a desobedece Dios den hoffi di Eden, Dios no a yama Eva pa duna cuenta, pero e a yama Adam pasobra ta Adam E a duna e responsabilidad, como esun cu Dios a crea prome.
Esey ta nifica cu segun structura di Dios ta e homber ta cabes di cas,cu ta somete na Dios. e muher ta su ayudante y e yiunan ta obedece nan mama y tata.
Ta un structura fuerte pero tambe hopi delicado,pasobra asina cu un trata di overrule otro, desobedencia ta drenta , discucion ta drenta, e barco ta bira sin rumbo, te ora nan arepenti, y bini bek den e structura di Dios.
Y nos ta mira cu hopi biaha hende ta yega te na mesa di divorcio, pasobra nan no ta comprende e structura di Dios, of nan no kier somete na e structura di Dios.( Lesa Efesionan 5:21).
Adam a kere cu e por a tira falta riba Dios y e muher cu Dios a dune, pero Dios a mustre cu ta e mes mester carga su responsabilidad.
Un homber casa mester tene cuenta cu esaki( Genesis 2:24) Dios na prome lugar,despues bo esposa y bo yuinan, bo iglesia, bo trabao of negoshi, no lubida riba bo grandi nan etc.
Nunca pone placa y material prome cu bo hogar, pasobra bo famia ta bo herencia, y regalo di Dios..
Por favor, pa no desvia di e sistema aki pasobra e tin consecuencia hopi duro.
Un hende no por ta bon Hefe na trabao y mal mayor na cas.
Un hende no por ta integro na trabao , den su posicion, cu titulo, y na cas e ta un adultero y abusador.
Un hende no por ta santo den iglesia of misa y na cas , su boca y su comportacion ta laga hopi di desea.
Un hende no por ta man los cu placa, happy hour, den fiesta cu amigo, y mientras utilidad ta cay atras na cas.
Un hende no por ta casa y e tin otro muher of otro homber y su yuinan na pasa malo pa e motibo ey.
A yega e momento, cu nos tur mester,realisa e balor di bon testimonio, y etica y moral mester bolbe den famia.
Bay bo cas,serca bo hendenan, y conta nan ki cosnan grandi,Senjor a haci pa bo, y con E a tene misericordia di bo. ( Marco 5:19).
Laga boso lus briya dilanti di hende,di tal manera cu nan por mira boso bon obranan,y glorifica boso Tata cu ta den cielo.( Mateo 5:16).
Stimanan, si Dios a stima nos asina tanto,nos tambe mester stima otro. Ningun hende no a mira Dios nunca, si nos stima otro Dios ta permanece den nos y su amor ta wordo haci perfecto den nos.( 1 Juan 4:11-12).
E muher sabi ta traha su cas, ma esun bobo ta bashe abao cu su mes man (Proverbionan 14:19.
Laga tur dia nos papia, palabra di bendicion den nos cas.
Sinceramente, Pastor Marcel Balootje
