Por ta tin hopi hende cu pregunta , y hopi cu ta duda, y ta haci e pregunta dicon te ainda nan no a hanja nan contesta, awel depende na ken bo ta haci oracion, con bo ta haci oracion, kico bo peticion ta, si bo ta den boluntad di Dios, si bo ta pidi pa duna Dios e Gloria, of bo ta haci oracion, pa bo broma, y haci cos riba bo mes.
Pasobra ora nos ta haci oracion Dios ta wak nos curason, y si nos ta pidiendo robes por ehempel: Cu vengansa den nos curason pidiendo Dios pa haci danjo na un persona e oracion ey no ta wordo scucha, pasobra e no ta den boluntad di Dios, pero e ta un oracion carnal den cual nos kier venga y no ta pidiendo husticia.
Dios no ta paga malo, cu malo den ningun sentido, un hende cu ta paga malo cu malo , no ta crece den ningun sentido, pasobra pa bo haci malo cu un hende , bo mester pone bo mes na mesun nivel di maldad, y esey no ta bini di Dios.
Awel manera Hesus a bisa den Juan 14:13-14, ta promesa nan cu nos tin cu para riba dje, pa mira Dios su milager sosode, pasobra ta locual Hesus a priminti, y tur locual Hesus priminti e ta cumpli cune.
Tin hopi cos cu ta bay sali na cla ora hende sigi perservera den oracion, pasobra Dios no ta lubida, y ora hende kere cu Dios ta sconde cos, nan ta completamente ekiboca, pasobra awor Dios ta bay saca e asunto na cla, pasobra Dios ta luz y den dje no tin nada, nada di scuridad.
Ora nos haci oracion na Dios pidiendo claridad den un asunto, pa asina demostra e grandesa di Dios, den nos bida , Dios ta hacie pa mustra tur hende cu e man di Dios ta haci e cosnan ey.(Isaias 41:20).
Rey Ezequias a haci oracion su so y a pidi Dios pa detene e enemigo, pa demostra cu tin Dios na Israel y Dios hacie.
Elias a pidi Dios baha candela for di cielo, pa trece e hendenan su curason bek na Dios, y Dios a hacie.
Hesus a papia cu Su Tata prome cu e lanta Lazaro for di morto, y e a yama Lazaro, cu tabatin 4 dia morto a sali for di graf.
Pablo y Silas den scuridad di prison a haci oracion y canta alabansa y Dios a kita e cadenanan.
Tin cosnan cu ta pone cu nos no ta hanja e contesta, y un di nan ta ora tin pica scondi, ora bo kier pa Dios saca tur cos na cla di otro hende pero locual ta bo parti bo no kier mishi mes cune.
No mete cu bruheria y na mismo momento bo ta menciona nomber di Dios, pasobra Dios lo basha e muraya abao, kibra tur atadura diabolico, y destrui tur altar di bruheria, Dios ta lus.
No preocupa pa nada, ma den tur cos,pa medio di oracion,y suplica y gradicimento, laga boso peticion ta conosi dilanti di Dios. Y e pas di Dios,cu ta surpasa tur comprendemento, lo warda boso curason y boso mente den Cristo Hesus.( Filipensenan 4:8).
No sea conforme e mundo aki,ma sea tranforma pa medio di e renobamento di boso mente, pa boso por comproba kico ta e bon, y agradabel y perfecto boluntad di Dios.( Romanonan 12:2).
Keda vigila y haci oracion pa boso no cay den tentacion, e spirito ta boluntario, ma e carni ta debil. (Mateo 26:41).
Sinceramente, Pastor Marcel Balootje
