Fraccion AVP den Parlamento di Aruba ta expresa su empatia profundo cu henter comunidad Arubiano pa e shock y tristesa causa pa e reciente accidentenan tragico di trafico cu a sacudi nos pais. Cada perdida di bida ta un herida grandi pa nos sociedad, y e dolor di e famianan afecta ta comparti pa nos tur.
Na respuesta inmediato riba e situacion, colega Parlamentario John Hart a tuma accion y pidi un vragenuur, pidiendo pa Minister di Husticia, drs. Arthur Dowers bin Parlamento pa informa riba e estado actual y e accionnan cu ta tuma pa mehora siguridad di trafico na Aruba.
E vragenuur y encuentro publico riba e tema a tuma luga riba 9 y 19 di januari. Desde e momento ey, e miembronan di Fraccion AVP no solamente a participa activamente den Parlamento, pero tambe a dedica tempo pa scucha e opinion di experto y di ciudadanonan comun. Nos ta convenci cu tur punto di bista ta importante pa por yega na solucionnan efectivo y duradero.
Den e dialogonan cu gobierno, ta considera un rango amplio di medida: desde mayor control policial y cambio den legislacion cu ta permiti castigo mas pisa pa infraccionnan serio, te na mehoracion den infrastructura vial y transporte publico, como tambe campañanan mas intensivo di concientisacion riba siguridad den trafico. Tur opcion ta riba mesa.
E reunionnan cu e Minister di Husticia, compaña pa e Alto Comisario di Cuerpo Policial Aruba tabata hopi fructifero. Fraccion di AVP den Parlamento di Aruba ta bay continua cu nan cu e proposito di monitor progreso y sigura cu e palabra ta traduci den accion concreto.
Pueblo di Aruba por ta sigur cu Fraccion AVP den Parlamento no lo keda trankil, te ora nos logra mas prevencion di accidente y un trafico mas sigur pa tur. Como parti di e compromiso ey, e Presidente di Parlamento di Aruba, Marlon Sneek y demas parlamentarionan lo ricibi diasabra awo e manifesto presenta pa famia di e victimanan. Lo scucha nan cu respet y atencion, y lo sigura na nan di nos compromiso firme pa un cambio real y duradero.
Siguridad den trafico ta un responsabilidad comparti, y AVP lo sigui traha sin descanso pa proteha bida riba nos ciudadanonan.
