Crecemento turistico mester bay compaña pa mehoracion den calidad di bida di e hendenan cu ta biba y traha na Aruba. Esaki ta e posicion di parlamentario y lider di fraccion di AVP, Jennifer Arends-Reyes, na ocasion di e reunion di Comision di Finansas cu Colegio Aruba financieel toezicht (CAft) y CAFT su comunicado di 23 di october.
Arends-Reyes ta destaca cu e observacionnan di CAft tocante presion riba mercado laboral, trafico, vivienda y servicionan di utilidad ta merece siguimiento. Segun e parlamentario, e hecho cu economia ta sigui desaroya positivamente mester bay hunto cu decisionnan cu ta responde na e realidad diario di comunidad.
“Turismo ta duna trabou y oportunidad na miles di famia. Nos ta orguyoso di e sector y di e hendenan cu ta sosten’e. Pero tambe ora nos papia di exito den turismo, nos mester wak con e exito ey ta traduci den un miho bida pa nos trahadornan, nos famianan y nos hobennan,” Arends-Reyes ta expresa.
Un direccion cla pa crecemento responsabel.
Pa e lider di fraccion AVP, e pregunta central ta con Aruba por sigui beneficia di turismo, mientras e ta proteha su espacio, naturalesa y e posibilidad pa su propio hendenan biba y progresa aki.
Esaki ta exigi coordinacion entre e diferente ministerionan y prioridadnan cla cu ta refleha den presupuesto y den inversionnan pa e proximo añanan. E desaroyo di e sector mester wordo evalua hunto cu e capacidad di nos infrastructura, disponibilidad di vivienda y e necesidadnan di mercado laboral.
Arends-Reyes ta pone enfasis riba formacion y oportunidadnan di crecemento profesional pa trahadornan. E ta considera importante cu esnan cu ta contribui na exito di turismo tin oportunidad pa desaroya nan capacidadnan, progresa den nan carera y mehora nan situacion.
“Un hoben cu ta cuminsa traha mester por mira un futuro pa su mes na Aruba. Y e hende cu ta dedica su bida na turismo mester sinti cu e sector ta ofrece oportunidad pa crece y mehora su situacion,” e ta señala.
Vivienda y calidad di bida den nos barionan
Acceso na vivienda pa poblacion local ta un di e prioridadnan cu, segun Arends-Reyes, mester forma parti di e vision pa futuro di turismo.
Den e cuadro aki, e parlamentario ta considera importante pa sigui duna forma na regulacion y control di acomodacionnan di huur pa corto termino, conoci como Short-Term Vacation Rentals (STVR). E proceso mester tene cuenta cu e contribucion economico di e actividad aki y tambe cu su impacto riba vivienda y convivencia den nos barionan.
Pa Arends-Reyes, infrastructura adecua y servicionan di utilidad cu por atende e necesidadnan di pais ta igualmente importante. E inversionnan den e areanan aki mester contribui na un entorno cu ta funciona bon pa tanto residente como bishitante.
Di plan pa resultado
E parlamentario ta enfatisa cu e siguiente paso mester ta ehecucion, cu responsabilidadnan cla y siguimiento pa determina si e decisionnan ta trece e resultado spera.
Pa Arends-Reyes, e bienestar di pueblo mester ta un punto di referencia constante ora ta evalua e rumbo di turismo y e inversionnan cu Aruba ta haci pa futuro.
“Nos responsabilidad ta di pensa mas leu cu e cifranan di bishitante di awe. Nos mester cuida loke a haci Aruba exitoso y tuma e decisionnan cu ta necesario pa e proximo generacion tambe por disfruta di un pais cu oportunidad y calidad di bida. E bienestar di nos pueblo mester ta e guia,” Arends-Reyes ta conclui.
