Pa cu e Common Good Conference, Plataforma Nacional Herencia di Sclavitud na Aruba ta comparti su mision pa fortalece consciencia historico, identidad cultural y cohesion social riba Aruba. E plataforma ta enfoca su trabou riba cuater dominio central cu ta contribui na e bon comun.
Un di e pilarnan principal ta empodera e comunidad, y en particular hende di descendencia Africano, pa investiga nan propio historia. No solamente pa medio di investigacion academico, sino tambe pa medio di buskeda personal di storia, memoria y relato di antepasadonan.
E plataforma ta conserva y documenta historia den diferente forma, entre nan video, portret y audio, cu meta pa preserva e legado aki y pasa esaki pa generacionnan futuro. E trabou educativo ta complementa cu enfoke riba conmemoracion y celebracion di dianan historico cu ta forma parti di e identidad colectivo di Aruba.
“Nos kier pa comunidad ta consciente di loke a pasa den pasado, pa nos por transforma e aspectonan negativo den forsa positivo den presente,” segun Sirelda Jackson, representante di e plataforma.
Pa medio di e Common Good Conference, e plataforma ta mira un oportunidad pa presenta su mes na comunidad, intercambia conocemento cu otro organisacionnan y scucha idea/sugerencianan cu ta biba den sociedad. Segun e plataforma, e aspecto social y e confiansa colectivo ta esencial pa crea sanacion y progreso duradero.
E organisacion ta enfatisa cu un comprendemento profundo di historia ta contribui na un sentido mas fuerte di identidad comun, respet mutuo y responsabilidad comparti. Transformacion social, segun e plataforma, ta rekeri esfuerso di tur hende den comunidad.
“Solamente hunto nos por transforma e herencia di pasado den un forsa pa futuro,” Jackson a agrega.
Pa medio di su participacion den e Common Good Conference, Plataforma Nacional Herencia di Sclavitud ta reafirma su compromiso cu e bon comun, invitando e comunidad pa participa activamente den dialogo, memoria y construccion di un Aruba mas consciente, solidario y uni.
