Dia 9 di februari 2026, Aruba ta conmemora un fecha importante den su historia politico: e 55 aniversario di existencia di Movimiento Electoral di Pueblo (MEP). Un partido cu a nace for di pueblo, cu pueblo y pa pueblo, y cu durante mas cu cinco decada a hunga un rol fundamental den formacion di nos identidad nacional y nos libertad politico.
E aniversario aki ta mas cu un fecha simbolico. Ta un momento pa reflexiona riba un historia profundo di lucha, sacrificio y vision. MEP a wordo funda door nos libertador, Betico Croes q.e.p.d., cu un meta claro y innegociabel: libera Aruba y logra Status Aparte. Un soño cu, danki na perseverancia y determinacion, a bira realidad.
Durante su 55 aña di existencia, MEP no a limita su mes na politica electoral. E partido a funciona como un verdadero movimiento social, cu dignidad humano, husticia social y amor pa patria semper como su pilar principal. MEP ta e bos di hopi Arubiano cu no semper tabata wordo scucha, y MEP nunca a tene miedo pa para firme y defende e interes di nos isla. Libertad, manera semper a wordo afirma, no tin prijs.
Pa mi personalmente, ta un gran honor y orguyo pa forma parti di e movimiento aki y pa sigui e caminda cu hopi lider grandi a cana prome cu mi. Cu MEP Aruba a mira stabilidad, desaroyo economico significativo y e consolidacion di nos Status Aparte como fundamento di nos futuro.
E reto pa nos e generacion actual di MEP ta grandi. E libertad y Status Aparte cu nos antepasadonan a lucha pa logra, awe ta den peliger. Tin forsanan politico cu ta mira nos autonomia como un producto negociabel. Esaki ta algo cu, bou di ningun circunstancia, por wordo acepta pa nos pueblo. E tarea di MEP awe ta pa conserva e “klompi di diamante” cu ta nos libertad.
Mi kier expresa un agradecimiento especial na famianan di dfm sr. Betico Croes, como fundador y visionario di MEP; na sr. Nelson Orlando Oduber, como lider honorario y guia firme durante 25 aña; y na nos lider actual, sra. Evelyn Wever-Croes, cu awe ta carga e responsabilidad di lidera un partido cu historia grandi, y cu a surpasa retonan grandi cu MEP den un mundo cambiante.
Tambe, un palabra di gratitud pa tur ex-candidatonan, lidernan di barrio, miembronan di directiva, comisionan y e militancia. Na cada votador y sostenedor di MEP: boso confiansa y perseverancia ta e curason di e partido, den tempo bon como den tempo dificil.
Masha pabien Aruba. Masha pabien Movimiento Electoral di Pueblo cu su 55 aniversario. Cu Dios sigui bendiciona nos pais y guia nos den sabiduria, cu forsa y amor.
