Den Haag – Aruba lo cuminsa vacunacion contra COVID-19 den e siman di 15 di Februari proximo. Asina Minister Plenipotenciario, sr. Guillfred Besaril a duna di conoce despues di un reunion telefonico awe diabierna 22 di januari cu Secretario di Estado pa Salubridad Publico, sr. drs. Paul Blokhuis. Secretario di Estado Blokhuis ta e mandatario encarga cu e programa di vacunacion pa e parti Caribense di Reino Hulandes.
Minister Besaril a tene e reunion aki den cuadro di e negosacionnan andando entre Minister di
Salubridad Publico di Aruba, sr. Dangui Oduber y gobierno Hulandes. Minister Besaril: ‘Un punto importante cu mi a elabora riba dje cu sr. Blokhuis, ta e necesidad na vacuna (cuanto) y kendenan ta e promenan na bin na remarca pa wordo vacuna den e prome kwartaal di 2021. E autoridad riba tereno di salubridad na Aruba a duna gobierno indicacion di kendenan den e sector di salubridad ta e promenan pa despues sigui di biaha cu e grupo di habitantenan riba 60 aña (60+) comokiera cu esaki ta e grupo mas vunerabel den nos comunidad. Secretario di Estado Blokhuis a confirma na mi persona cu proximamente lo tin un funcionario di su Ministerio na Aruba pa asina asisti e autoridadnan local cu e preparacionnan necesario y coordina un ke otro pa por cuminsa cu e accion vacunacion contra COVID-19 den e siman di 15 di Februari proximo”, Minister Besaril a declara.
Ademas di e plannan concreto pa Februari proximo, tambe e mandatario, sr. Blokhuis, a indica na sr. Besaril, cu Hulanda tin e intencion – maske hopi ambicioso pero perfectamente realisabel si tin bon coordinacion – pa Aruba y henter e parti Caribense di Reino ta full vacuna contra e “Virus di Corona” no mas tarda cu fin di Juni 2021. E noticia aki segun Minister Besaril, ta sigur un primicia cu no solamente ta duna Pueblo di Aruba un empuhe positivo den su lucha contra e pandamia, pero ademas ta brinda nos Isla e perspectiva necesario den su esfuerzo di recuperacion economico.
