Debate riba HOFA no ta solamente un discusion tecnico di finansa publico. Segun parlamentario Eduard Pieters, e asunto aki ta toca e esencia mes di democracia y autonomia di Aruba dentro di Reino Hulandes. Pa fraccion di PPA, e cambionan cu ta propone bou di e famoso consensusrijkswet HOFA ta pone en cuestion un di e principionan mas fundamental di un pais autonomo: e budgetrecht di Parlamento di Aruba.
E Budgetrecht: Curason di democracia Parlamentario
Den cualkier democracia parlamentario, Parlamento tin e autoridad final riba presupuesto di su pais. Ta e mecanismo principal cu pueblo tin pa controla gobierno. Pero segun Pieters, e structura cu ta proponi den HOFA ta cambia e balans aki. E proceso di supervision y decision financiero lo ta conecta directamente cu Rijksministerraad y, segun interpretacion di PPA, incluso por involucra influencia di Tweede Kamer. “Esey ta lanta un pregunta fundamental:
Si decision crucial riba presupuesto di Aruba ta depende di e institucionnan na Den Haag, kico ta e rol real di Parlamento di Aruba? Con lo realisa Vox Populi, vox Dei, Bos di Pueblo ta Bos di Dios? Pueblo di Aruba ta bay eleccion pa scoge 21 parlamentario di Aruba, no pa scoge representante den Tweede Kamer.” Pieters ta cuestiona.
Autonomia den practica, no solamente den palabra
Aruba su posicion constitucional ta basa riba Statuut voor het Koninkrijk der Nederlanden, unda e paisnan autonomo tin responsabilidad pa maneha nan propio asuntonan interno, incluyendo finansa publico den un forma transparente y aplicando Bon Gobernacion. Pieters ta adverti, cu si presupuesto di pais ta condiciona bou di e decisionnan di Reino, autonomia financiero lo bira limita. “Esey ta un cambio profundo den practica di autonomia cu Aruba a gana cu su Status Aparte na 1986. Pa PPA, esaki ta un tesoro historico cu no por entrega sin debate amplio cu pueblo”.
Decision liher ta crucial den momento di crisis
Otro preocupacion cu Pieters a lanta ta e liheresa y flexibilidad di tuma decision politico. “Aruba, como isla chikito den desaroyo, mester por reacciona rapidamente ora un crisis presenta. Historia reciente a mustra esaki claramente durante crisis economico global, durante pandemia di COVID-19 y
durante situacion internacional, cu ta afecta turismo y economia. Gobierno di Aruba tabata por tuma decision inmediato pa proteha economia y bienestar di pueblo”.
Pero segun Pieters, si proceso financiero ta depende di mecanismo largo di Conseho di Minister di Reino, capacidad di reaccion rapido por ta limita.
“Nos no por keda cu man mara wardando decision na Den Haag ora situacion local ta exigi accion inmediato,” el a enfatisa. “Anto e pregunta ta: Kico lo ta e aporte di e decision aki pa Aruba por sigui desaroya como isla chikito den desaroyo?” Pieters ta puntra.
Les di Caribe: Caso di Bonaire
Pieters tambe a menciona experiencia di Bonaire, cu despues di 2010 a bira municipio special di Hulanda. “E modelo aki ta crea un realidad diferente, unda hopi decision administrativo y financiero ta determina directamente den sistema hulandes”. Pa Pieters, Aruba nunca a lucha pa e posicion ey. “Nos Status Aparte tabata precisamente pa mantene un posicion unico y autonomo dentro di Reino”. Debate riba HOFA no ta solamente huridico of financiero. Ta un pregunta fundamental pa futuro politico y pueblo di Aruba.
Finalmente fraccion di PPA ta pone un pregunta directo na gobierno: Con Aruba por afirma cu su autonomia ta intacto, si uno di e poder mas importante di Parlamento, e budgetrecht, ta keda limita? Aruba su autonomia tabata conkista cu decada di lucha politico y sacrificio historico di su pueblo. E decisionnan cu tuma awe, lo determina si generacion futuro lo hereda e mesun libertad di decision cu pais a gana na 1986. “Ta p’esey a hinca un couplet mas den nos Himno Aruba Dushi Tera cu ta un simbolo nacional caminda tin e frase: Cu Dios por guia y conserva su amor pa libertad.” Pietets a indica. Pa Pieters, e mensahe ta cla: autonomia no por ta negosha sin confiansa y respet pa mantencion di democracia di Aruba!
