Den Bijbel Genesis 3: 14-16, Dios Tata a bisa na e colebra satanas: “Lo Mi trece enemistad entre abo y e muher, entre bo descendiente y entre e descendiente di e muher. E muher cu su descendiente lo trapa riba bo cabes y lo bo lastra bao di su pia.” Akinan e muher ta Maria, cu Dios Tata a escoh’E pa e bira Mama di E Salbador. Maria Su descendiente ta, Cristo-Hesus y tur esnan den Cristo-Hesus Su Iglesia. E descendiente di e colebra satanas ta esnan cu no ta acepta, cu no ta honra y cu no ta stima Maria y cu ta persigi e descendientenan di Maria den Cristo-Hesus Su Iglesia. Den Bijbel Revelacion 12: 17: “Anto e dragon a rabia contra e muher y e’l a bai hasi guera na e demas yiunan di e muher.” Akinan e diabel tin rabia riba Maria y e diabel ta persigi y ataka e yiunan di Maria den Iglesia. Den Bijbel Lucas 1: 41-43, Maria ta bishita Su prima Elizabeth y Elizabeth a keda yena cu Spirito Santo y a bisa: “Di unda mi ta merese e honor cu Mama di mi Senjor ta bishita mi?” Maria ta wordo yama Mama di Dios, pasobra Su Yiu Hesus ta E di dos Persona di E Santisima Trinidad. Y den Bijbel Huan 20: 28, akinan Apostel Thomas ta expresa na Hesus: “Mi Senjor y Mi Dios.” E palabra Senjor ta significa Dios, pesey Maria ta Mama di Dios. Den Bijbel Lucas 1: 46 – 49; “Maria a bisa: Mi curason ta alaba Senjor, Mi Spirito ta alegra den Dios Mi Salbador, pasobra E a mira riba Su humilde sirbidora. For di awor, tur generacionnan lo jama Mi felis. Di berdad E cu ta Todopoderoso, a haci na Mi, Su obranan milagroso y Santo ta Su nomber.” Akinan tur e pueblonan di mundo lo honra y lo venera Mama Maria. Den Bijbel Huan 19: 25-27, akinan Hesus na Crus klaba a bisa: “Mama, ata bo yiu eynan y despues E’l a bisa Huan: Ata bo Mama eynan.” Akinan Hesus ta ofrece nos Su Mama, pa nos stimel’E, pa nos honrel’E y pa nos acepta Maria como nos Mama Celestial. Manera cu e Apostel Huan a acepta Maria como su Mama y e Apostel Huan ta representa e Iglesia di Cristo-Hesus, pesey Maria ta Mama di Iglesia.
Den Bijbel 1 Reynan 2: 19-20, ta bisa: “Ora cu Betsabe, e mama di Rey Salomon a drenta den e sala di e Rey, pa papia cun’e ariba asunto di Adonias, e Rey a lanta pa ricibi su mama y a buig su dilanti. Despues e’l a bai sinta riba su trono y a duna ordo pa nan trece un stoel di trono pa su mama, e mama a sinta na man drechi di su yiu Rey Salomon y a bisa su yiu: Mi kier a pidi bo un fabor chikito, mi no ta spera cu bo lo nenga mi. Rey Salomon a contesta: Mi mama, pidi mi loke bo kier, lo mi no nenga bo.” Akinan e mama di Rey Salomon a haya un trono, pa sinta na man drechi di su yiu Rey. Hesus ta Rey di Universo, den Bijbel Lucas 1: 32 – 33, na unda e Angel Gabriel a anuncia na Maria: “Senjor Dios lo duna Hesus e trono di Su antepasado Rey David y te den eternidad lo E ta Rey di e descendientenan di Jacob y Su Reino lo no tin fin.” Cristo-Hesus ta Rey di Universo y ta sinta riba Su Trono den Gloria. Awor, lesa Bijbel Revelacion 12: 1, ta bisa: “Un senjal grandi a aparece na Cielo: un Muher bisti cu solo, cu luna bao di su pianan y riba su cabes un corona di diesdos strea.” E Muher bisti di solo ta Maria y e corona di diesdos strea ta simbolisa, e oficio Real den Reino di Cielo. E significacion di solo, luna y streanan bao di Su pianan, den Bijbel Genesis 37: 9-11, akinan e Profeta Jozef ta sonja di mira con, solo, luna y streanan ta buig su dilanti y esaki ta simbolisa, Reinado y Autoridad. Awor nos ta compronde, cu Mama Maria ta Reina di Cielo y di Tera y Mama Maria ta sinta na Su Trono na man drechi di Su Yiu Hesus. Hesus Rey di Universo, lo no nenga Su Mama fabornan, mescos cu Rey Salomon no a nenga Su mama fabornan.
Un mensahero di Dios.
Scirbi pa Seferino Tromp
