E Ministerio di Salubridad, na nomber di Land Aruba, a realisa e traspaso oficial di Hospital Dr. Horacio Oduber (HOH), un momento sumamente importante pa comunidad di Aruba y pa desaroyo di e sistema di salud. E acto a tuma luga den colaboracion cu Stichting Onroerend Goed Aruba (SOGA), Aruba Investment Bank (AIB) y Dienst Openbare Werken (DOW).
E traspaso oficial ta conclui e fase final di un proceso di renobacion y expansion cu a cuminsa na aña 2014 y cu a dura mas di dies aña. Durante e periodo aki, a amplia y modernisa e hospital, incluyendo mehoracion di facilidadnan manera sala di emergencia, facilidadnan pa pashentnan y servicio ambulatorio, cu e meta pa mehora e calidad, acceso y eficiencia di cuido. E proyecto aki ta entre e proyectonan di construccion mas grandi den historia di Aruba.
E momento historico aki ta marca e culminacion di un trayecto largo y e paso pa uzo completo di e facilidadnan renoba. E logro aki a bira posibel danki na cooperacion entre diferente partnernan.
Ministerio di Salubridad ta gradici tur partnernan institucional y profesionalnan cu a contribui na realisacion di e proyecto aki y ta reconoce e esfuerso colectivo cu a haci e momento aki posibel.
Minister di Salubridad Publico, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a indica:
“Despues di mas di dies aña di trabou, awe nos ta yega na un momento importante pa nos pais. Cu e paso aki, nos ta fortalece nos sistema di salud cu facilidadnan moderno y mas accesibel, pa garantisa cu tur ciudadano tin acceso na cuido di calidad. Esaki ta un inversion den bienestar di nos comunidad, awe y pa futuro.”
E Ministerio ta reafirma su compromiso pa sigui fortalece e sistema di salud y inverti den facilidadnan moderno cu ta responde na e necesidadnan di comunidad.
