Diahuebs atardi, comunidad di Noord, famia, invitadonan special, representantenan y lidernan a reuni pa celebra inauguracion di un rotonde nobo, cu oficialmente a ricibi e nomber “Rotonde Ovito Tromp”, na honor di un baluarte profundamente stima den e bario.
Durante e ceremonia, famia di Ovito Tromp a comparti palabranan di recuerdo. Den representacion di famia, su subrino Jourick Blanco a destaca cu Ovito Tromp tabata primeramente un homber di famia, cu a laga un marca profundo como ehempel di respet, disciplina y amor. Segun Jourick, cual ta actual presidente di e parti deporte di Centro di Bario Noord (CBN), a indica cu e balornan cu Ovito a inculca ta esnan cu su famia ta sigui tene na halto te dia di awe.
“Mogichi” tabata conoci como un persona fuerte cu un curason grandi, semper dispuesto pa yuda y guia otro. Su pasion pa deporte, particularmente beisbol, y su dedicacion na hobenan di su entorno a crea un impacto duradero, inspirando generacionnan den y pafor di e tereno deportivo.
Minister di Infrastructura Rene Herdé a subraya cu Ovito Benito Tromp tabata un ehempel pa Aruba, y specialmente pa districto di Noord. El a destaca su talento den enseñansa, deporte y cultura, pero mas importante ainda, su compromiso cu su famia y comunidad.
Prome Minister Mike Eman a enfatisa cu Ovito Tromp a dedica su bida na servicio di otro hende. Como docente y lider di comunidad, el a contribui activamente na desaroyo social, educativo y deportivo, semper cu un fuerte sentido di responsabilidad y compromiso.
Ovito Benito Tromp (1955–2015) ta wordo recorda como un figura clave den Noord. Como maestro certifica desde 1979, el a dedica su carera na enseñansa y a aporta na desaroyo di curiculo na Departamento di Enseñansa. Como presidente di Centro di Bario Noord, el a lidera diferente iniciativa enfoca riba bienestar di comunidad, incluyendo expansion di creche “Chikitin Bin Bin”, desaroyo di un ballpark nobo y creacion di Parke di Recreacion di Noord.
Den deporte, e tabata un referente den beisbol local, formando hobennan cu disciplina y pasion. Culturalmente, e tabata activo como miembro di Coro Santa Anna, tocado di mandolin y participante den grupo folklorico “Tipico Noord”, contribuyendo na preservacion di tradicionnan di Aruba.
Pa su dedicacion extraordinario, Ovito Tromp a wordo honra cu titulo di Ridder in de Orden di Oranje-Nassau na 2002.
E deseo pa honra su legado cu e nominacion di un rotonde a keda bibo den comunidad y su famia a lo largo di añanan. Awe, e aspiracion aki a bira realidad, reflehando e reconocimento amplio pa su contribucion na Noord y Aruba.
E inauguracion ta forma parti di iniciativa pa reconoce figura importante den comunidad y fortalece sentido di identidad y historia den diferente bario di Aruba.
Mas cu tur cos, Ovito Tromp lo keda den memoria como un boluntario di curason: un homber accesibel, semper dispuesto pa yuda, y cu un profundo amor pa su comunidad.
Cu e rotonde aki, su legado ta sigui bibo como simbolo di dedicacion, perseverancia y orguyo pa Noord y Aruba henter.
