Dialuna 4 di mei 2026, Directie Arbeid en Onderzoek (DAO) a habri oficialmente e portanan di ‘Tienda Legal Laboral’ (TLL) na MFA Savaneta. E proyecto piloto innovativo aki ta marca un transformacion importante di loke ta e seccion di Conflicto y Retiro. Cu apertura di un localidad nobo den MFA Savaneta, DAO ta trece conseho laboral y informacion preventivo literalmente mas cerca di e ciudadano.
For di conflicto pa prevencion
Lansamento di Tienda Legal Laboral ta mas cu simplemente un cambio di nomber; e ta representa un manera nobo di traha y proactivo. Caminda antes e enfoke tabata riba soluciona conflictonan laboral cu a surgi caba, TLL ta fungi awo tambe como un centro di informacion central enfoca riba prevencion. Door di informa trahado y dunado di trabou den un fase trempan tocante nan derechonan y debernan, TLL ta aspira na un mercado laboral mas sano y transparente na Aruba.
“Nos no ta stop aki, nos tin diferente districto cu lo conta cu e servicionan di Tienda Legal Laboral. No tin un departamento mas importante cu Departamento di Labor, mirando cu nan tin diferente funcion cu nan ta ehecuta cu ta vital pa un mercado laboral sano y ekilibra”, asina Minister di Labor mr. Wendrick Cicilia a expresa.
Accesibel y den bario
Un punto clave di e proyecto piloto aki ta e accesibilidad. Cu Tienda Legal Laboral nos ta baha e drempel pa conseho significativamente, door di ta presente den bario, cuminsando cu MFA Savaneta. MFA Savaneta ta e prome localidad cu ta habri su portanan, y pronto lo sigui cu otro MFAnan riba e isla pa asina por ofrece e servicio aki na mas luga pa brinda apoyo den un ambiente neutral y di confiansa. Tienda Legal Laboral ta aspira pa brinda servicio basa riba cinco pilar: Husto, Profesional, Servicial, Uniforme y Accesibel. Sea ta trata di pregunta tocante pago di salario, control riba relacion di trabou, contrato laboral of mediacion den conflicto laboral; Tienda Legal Laboral t’ey tanto pa e trahado como pa e dunado di trabou.
Intake
Pa mantene e drempel mas abou posibel, TLL lo funciona a base di ‘intake’. Nos lo purba atende ciudadanonan mesora segun disponibilidad. Si esaki no ta posibel, nos ta yuda traha un cita pa un otro momento.
Cuminsando dialuna 4 di mei, e siguiente orarionan di apertura pa intake lo ta vigente:
- Dialuna – Diabierna: 08:00 – 12:00 & 13:00 – 15:30
- Diaranson: 08:00 – 12:00
Localidad y contacto
E proyecto piloto ta drenta na vigor oficialmente na MFA Savaneta (Savaneta 121-F). Pa ciudadanonan cu ta prefera di haya informacion via telefon of e-mail prome, TLL ta disponibel temporalmente via:
- Telefon: 5932107
- E-mail: dao.tll@aruba.gov.aw
Departamento di Labor y Investigacion ta invita e comunidad completo pa bin cera conoci cu e forma nobo di servicio aki. Hunto nos ta traha riba husticia na pia di trabou, eynan mes den bo bario.
