Parlamentario di MEP, Xiomara Maduro, a manda preguntanan na Minister di Cultura, sr. Mike Eman. E parlamentario kier sa dicon Scouting Aruba no a haya oportunidad pa participa den e celebracionnan nacional, manera Dia di Himno y Bandera, y Dia di Rey 2026.
Scouting Aruba merece respet!
Scouting Aruba pa hopi aña ta forma un parti esencial di e celebracionnan nacional y ta representa balornan importante manera disciplina, compromiso civico y amor pa pais. E exclusion reciente, segun Maduro, no solamente ta un falta di respet, sino tambe incomprendibel y inaceptabel, considerando e contribucion continuo di e movimiento scout na desaroyo di hoben y sociedad Arubiano.
Maduro a indica cu e situacion aki ta lanta preguntanan serio tocante transparencia, criterio di seleccion y respet institucional pa organisacionnan cu tin un rol importante den formacion di nos identidad nacional.
E parlamentario ta pidi contesta riba algun pregunta importante, manera:
- Dicon scouting no a wordo inclui
- Cual regla a wordo uza pa scoge ken por participa
- Si e decision lo wordo cambia
- Si lo tin miho coordinacion pa futuro
Parlamentario Maduro ta enfatisa cu esaki no ta un asunto menor, sino un cuestion di coherencia den politica cultural y reconocemento di organisacionnan cu ta contribui activamente na bienestar di Aruba.
Finalmente, e parlamentario a indica cu e ta spera di haya contesta oficial di Minister Eman dentro di un periodo di tres (3) siman.
