Parlamentario Endy Croes a duna un resumen riba e reunion Publico recien, unda Parlamento a trata e presupuesto di DOW pa aña 2026. Durante e debate, Minister Baba Herdé tabata mustra basta cansa y no tabata brinda e informacionnan nesesario. No obstante, Fraccion di MEP a keda insisti pa por logra haya algun contesta for di e mandatario, pa asina cumpli debidamente cu e responsabilidad di controla gobierno.
Presupuesto di DOW pa 2026
E presupuesto total pa DOW pa e aña 2026 ta un suma di 52 miyon florin. E fondo aki ta reparti den e siguiente categorianan:
- 17 miyon florin: Destina na gasto di personal, incluyendo e contribucion di dunado di trabou (werkgeversbijdrage).
- 35 miyon florin: Destina na bienes y servicionan (goederen en diensten).
Un punto di discordia fuerte tabata e destino di e 18 miyon florin cu e gobierno anterior (MEP) a laga presupuesta pa mantencion y construccion di caretera. E Fraccion di MEP a confronta Minister Herdé na dos ocasion riba kico a pasa cu e 18 Miyon florin aki, pero e mandatario no por a duna un contesta cla. Increibelmente, Minister Herdé a pretende cu no tabatin plan pa esaki y a nenga cu e suma ey tabata existi den presupuesto.
Minister NO a lesa su propio documentonan
Parlamentario Croes mester a corigi Minister Herdé den sala di Parlamento, usando e mesun documentonan cu e Minister a manda dia 20 di februari 2026. Den e Memorie van Toelichting (Pagina 15) y e Master Plan DOW, ta para claramente:
“Eind 2024 is via de najaarsnota een bedrag van 18 miljoen gereserveerd voor de realisatie van de omzetting van bestaande zandwegen naar asfaltwegen en het bestaande asfaltwegen, in lijn met het Masterplan van DOW”. Pues den e ley y e documentonan cu Minister mes a manda Parlamento, e 18 miyon ta wordo confirma.
Con por ta posibel cu Minister Herdé ta splica cu No tin plan y No tin placa? Unico cos cu a pone nos pensa ta cu Minister mes no a lesa su documentonan cu e Departamentonan a prepara p’e, prome cu el a bin Parlamento. Croes a lamenta cu e mandatario no ta domina e materia y aparentemente no a prepara debidamente, faltando respet na e trabou di e departamentonan cu a prepara e documentonan aki.
Recorte di 18 miyon riba prome dia di gobernacion
Dia 28 di Maart 2025, gobierno AVP-Futuro a huramenta y e mesun dia a bin Parlamento pa trata cambionan den presupuesto 2025. E dia aki bou instruccion di Minister Geoffrey (Futuro), e Parlamentarionan “nobo” sin lesa nan documentonan a vota pa corta:
- 18 miyon florin di presupuesto di DOW
- 20 miyon florin di FCCA
- 6 miyon florin di Husticia
- 3 miyon florin for di fondonan pa subsidia stichtingnan
- 3 miyon florin di Enseñansa
Tur e fondonan aki lo mester a bay den un “fondo di inversion” cu, segun Croes, te awe no a wordo lanta oficialmente.
Minister Herdé a splica cu awo cu el a pidi Minister Geoffrey Wever pa pasa 7 miyon florin bek di e “investeringsfonds” pa DOW. Pues AVP a entrega e 18 miyon florin di caretera na Futuro y awo e partido grandi (AVP) mester “yora” serca e partido chikito (Futuro) pa haya un limosna pa drecha caretera. “Asina no ta goberna un pais,” e parlamentario a finalisa. Croes ta lamenta cu despues di mas di 400 dia di gobernacion AVP-Futuro, no a inverti ni un solo florin den nos careteranan.
Aruba merece miho!
