Miembro di Parlamento pa AVP, Stephany Sevinger, a expresa su gran preocupacion durante e tratamento di Presupuesto DOW 2026, resaltando cu Aruba ta enfrenta no solamente un reto di mantencion di caminda, pero un berdadero crisis infrastructural cu a acumula durante añanan di falta di planificacion y accion efectivo.
Segun Sevinger, hopi ciudadano actualmente ta sinti cu e atencion cu finalmente ta duna na infrastructura nacional ta un sorto di “déjà vu”, despues cu durante añanan residentenan a yama pa solucionnan basico sin wordo scucha debidamente.
“Pueblo ta mira cu finalmente tin anuncio di mantencion, asfaltamento y renobacion den diferente bario, pero hopi comunidadnan ta recorda cu e mesun necesidadnan aki a wordo ignora pa largo tempo,” Sevinger a declara.
Durante su intervencion, el a comparti experiencia reciente na Bushiri, unda residentenan a expresa frustracion profundo cu problema persistente manera rioolering, mal holor, falta di iluminacion y abandono di espacionan publico.
“Pueblo no ta pidiendo luho. Pueblo ta pidiendo dignidad basico, siguridad y un bario cu ta digno pa cria famia,” parlamentario a enfatisa.
Sevinger a agrega cu e problema no ta limita na un solo area. Segun rapportnan existente, casi 30 bario den Aruba ta den estado critico di mantencion, reflehando un atraso structural den infrastructura basico y falta di mantencion preventivo durante añanan.
Parlamentario a indica cu datonan presenta den Presupuesto DOW 2026 ta confirma magnitud di e problema. Actualmente, aproximadamente 355 kilometer di caminda ta den mal estado, cu un necesidad di inversion calcula na cerca di 160 miyon florin pa recupera nan na un nivel aceptabel.
“Esaki no ta solamente un asunto di tapa buraco. Nos ta papia di un debe infrastructural nacional cu ta afecta calidad di bida, siguridad vial y desaroyo economico,” el a añadi. Paso ta caracteristico solamente di un gobierno di asignatura AVP cu ta duna atencion na caminda, scol, bario; ta p’esey awendia Aruba tin Green Corridor y Watty Vos Boulevard, barionan bunita pa esunnan di menos recurso y scolnan riba pia ainda. Mescos cu ta tipico di gobierno di MEP pa no haci nada y laga scol y otro edificio bira ruina, como por ehempel Juliana School y 65% di e camindanan riba nos isla.
A pesar di e preocupacionnan, Sevinger a reconoce cu e presupuesto actual ta mustra un cambio importante den direccion di un maneho mas strategico, incluyendo e introduccion di un “Masterplan Wegen” y enfoke riba asset management y planificacion multi-anual.
Sin embargo, e ta adverti tambe cu e velocidad di recuperacion ta sigui siendo un reto serio, considerando cu capacidad actual di asfaltamento ta rond di 30 kilometer pa aña, loke por nifica cu Aruba lo tuma mas di un decada pa elimina e atraso actual si no tin aceleracion significativo.
Pa conclui, Sevinger a enfatisa cu despues di tanto promesa y atraso den pasado, Parlamento tin un deber di sigui fiscalisa y monitor si e planonan presenta realmente ta wordo ehecuta.
“E documento ta mustra cu finalmente tin comprension di e gravedad di e problema. Awor cu e presupuesto a keda aproba, nos lo tene gobierno y DOW responsabel pa mantene disciplina financiero y operacional pa transforma vision den resultado concreto pa pueblo,” Sevinger a conclui.
