Durante su bishita oficial na Costa Rica, Prome Minister mr. Mike Eman a sostene un encuentro cu vice-president di Ecuador, María José Pinto, caminda a dialogo e oportunidadnan pa fortalece cooperacion regional.
Durante e conversacion, e lidernan a enfatisa e importancia di traha mas estrechamente como region, specialmente riba tema social y desaroyo comun.
Segun Prome Minister Eman, Aruba y Ecuador tin varios punto en comun y potencial pa amplia colaboracion, incluyendo conectividad y intercambio.
“Nos tin hopi pa comparti como region y nos mester sigui traha hunto pa fortalece e lasonan entre nos paisnan,” segun Eman.
Un di e temanan principal tabata e posibilidad pa mehora conectividad aereo entre Ecuador y Caribe. Eman a indica cu ya a pasa e mensahe pa investiga e opcionnan pa restablece e conexionnan cu tabatin antes, incluyendo dialogo cu aerolinea manera KLM.
E encuentro, describi como positivo y productivo, reflehando interes mutuo pa impulsa cooperacion y crea varios oportunidad nobo pa region.
