Artista y Embahador Cultural di Aruba Michael Lampe a wordo invita pa presenta discurso di apertura durante un dialogo internacional na cede principal di UNESCO na Paris, organisa pa Creative Commons.
E encuentro internacional tabata enfoca riba acceso habri y husto na patrimonio cultural den era digital, unda cu diferente expertonan, creadornan, archivistanan y representatenan internacional cultural a bin hunto pa discuti e futuro di patrimonio den mundo digital y AI.
Durante su discurso, Lampe a comparti e importancia di cultura, nos idioma Papiamento y memoria colectivo pa paisnan chikito manera Aruba den un mundo unda sistemanan digital y AI lo determina kiko ta keda visibel den futuro.
“Papiamento no ta exista automaticamente den e sistemanan digital. Si nos no carga nos mes idioma, archivo y historia nan activamente aden, nos ta core e riesgo pa keda afo di e memoria digital mundial.”
Lampe tambe a pone enfasis riba e importancia di crea acceso y digitalisa archivo historico pa generacionnan futuro por sigui descubri y reconstrui nan identidad cultural.
E participacion di Aruba na e dialogo internacional aki ta confirma cu nos isla tin un voz relevante den conversacionnan global tocante patrimonio, tecnologia, diversidad cultural y futuro digital.
Aruba cada biaha ta sigui posiciona su mes internacionalmente den e espacio cultural y creativo, e momento aki ta marca un paso importante pa visibilidad cultural Arubiano riba escenario mundial.
Peter Scholing di Biblioteca Nacional Aruba & Coleccion Aruba tambe tawata presente y hunto cu Michael a haci diferente reunionan importante pa Aruba.
“Nos ta sumamente contento cu e discurso di apertura di e embahador cultural di Aruba sr. Michael Lampe cu a laga nos sinti pakiko acceso liber na herencia cultural ta di gran importancia pa Aruba” segun Brigitte Vézina, directora di e organisacion Creative Commons .
