Lider di fraccion di AVP, Sra. Jennifer Arends-Reyes, a expresa cu e reciente reunion publico tocante instruccion pa cierto accion den sector di educacion supuestamente sin un proceso formal di destaho publico, a crea preguntanan cu merece contestanan pa clarifica e ponencia aki.
Segun Arends-Reyes, desde januari 2026 a ahusta e Ley di Contabilidad estableciendo cu pa sumanan entre 25 mil y 200 mil florin, un proceso formal di destaho publico no ta obligatorio. Den e caso aki, Minister Croes a splica cu mirando e montantenan envolvi, realmente no tabata necesario pa sigui un destaho publico, aunke ministerio a opta pa haci esey di tur manera.
“Transparencia y bon gobernacion ta fundamental den un pais democratico. Pueblo di Aruba tin derecho di sa con decisionnan ta wordo tuma, specialmente ora ta asuntonan den comunidad,” Arends-Reyes a declara. Sin embargo, e parlamentario a enfatisa cu tambe mester tin un balans entre transparencia y e necesidad pa actua cu rapidez ora continuidad di enseñansa ta na peliger.
“Educacion ta un sector primordial, e ta e base di futuro di Aruba. Ora scolnan ta enfrenta falta di material esencial, sosten digital of otro servicio necesario y continuidad gobierno no por simplemente laga proceso administrativo causa retraso den enseñansa,” el a agrega.
Arends-Reyes a splica cu e ley mes ta contempla excepcionnan precisamente pa situacionnan extraordinario unda urgencia ta exigi accion inmediato. Segun e parlamentario, si Ministerio di Enseñansa a determina cu un proceso regular di destaho publico lo tuma demasiado tempo y lo pone continuidad educativo na riesgo, e uzo di un excepcion por considera un decision responsabel.
Tambe el a señala cu den e caso specifico di material educativo pa Papiamento y Hulandes como idioma stranhero pa scolnan basico, e excepcion en realidad no tabata necesario, hustamente pasobra e suma ta bou di e limite cu ley ta exigi pa un destaho publico.
“Mi ta completamente pro transparencia, pero mi ta tambe pro progreso. Aruba mester un sistema educativo moderno, fuerte y efectivo. Y pa logra esey, gobierno mester por actua rapido ora situacion ta exigi esey, pero semper cu claridad y responsabilidad” Arends-Reyes a conclui.
