Homber complice di importacion di 381 kilo di marihuana condena na 4 aña di prison
ORANJESTAD – E homber A.B. (49) a presenta den Corte pa scucha su sentencia. Hues ta haya A.B. complice di importacion di 381 kilo di marihuana.
SOLO DI PUEBLO por a compronde cu Fiscal a exigi 5 aña di prison y Hues a baha e castigo exigi pa Fiscal.
Luna pasa durante tratamento di e caso a tuma lugar caminda Hues a remarca cu A.B. a yega di cay sera caba pa traficacion di droga. Segun A.B. dos biaha el a wordo condena pa traficacion di droga. Tur dos biaha tabata 22 luna di prison. Tambe e tin un condena di 12 luna di prison pa traficacion di hende. Hues a puntra A.B. si e gusta prison pasobra ya ta 3 biaha cu el a haya castigo di prison. A.B. a bisa cu door di necesidad el a haci esey. Den e caso aki, A.B. a bisa cu e lo a haya 20 paki di marihuana cu ta mas o menos 20 mil florin como pago.
EXIGENCIA DI FISCAL
Fiscal a bisa cu e ta haya legalmente proba cu A.B. ta envolvi den traficacion di droga. Fiscal a bisa cu Servicio di Inteligencia di Polis a haya informacion cu A.B. lo tin importacion di droga. Tabatin auto ta warda e boto y ora Guarda Costa a bay riba e boto, e boto a drenta den mangelnan y e hendenan a core bay. A logra detene un di e hendenan. A haya combersacion di A.B. den cellular caminda e ta bisa cu e ta cla pa ricibi e cargamento. Den un otro cellular ta mira potretnan di e pier na unda e boto lo mester a yega. Fiscal a bisa cu e usamento di droga ta causa adiccion y fomenta criminalidad. El a remarca cu A.B. ta un residivista. Fiscal ta haya cu A.B. no ta realisa e daño cu e ta haciendo na comunidad. Fiscal a exigi 5 aña di prison y e 2 cellularnan lo mester keda confisca.
ABOGADO
Mr. de Koning a bisa Hues cu e ta haya cu A.B. a purba y mester considera esaki un intento di complice di importacion. Na opinion di abogado, A.B. su trabao tabata solamente ricibi y warda e droga. Esey no a keda realisa ya cu e droga a keda intercepta. E abogado ta haya cu no tabatin cooperacion estrecho y pesey e no ta haya cu por papia di complice. Segun e abogado, A.B. no tabata riba e boto y no tin nada di haci cu e organizacion di e viahe di e boto. Su trabou tabata mas bien facilita cu e droga ta wordo warda pa otro busca. E abogado a pidi Hues pa no considera A.B. complice di importacion di lote di marihuana.
SENTENCIA
Diabierna ultimo e sentencia a tuma lugar caminda Hues a bisa cu abogado a bisa cu A.B. no ta complice di e traficacion di e lote di droga. Hues ta haya cu A.B. a yuda importa 381 kilo di marihuana. Hues a bisa cu A.B. tabata na e rancho ta warda e boto yega. Hues a mustra cu for di investigacion ta mustra cu for di 9 Mei 2025, A.B. lo a manda coordinacion pa esnan cu ta trece e droga, unda e rancho ta. A.B. a bisa cu a palabra cu un Venezolano y un Colombiano pa e droga yega. E lo haya 20 liber di marihuana. For di su cellular por a mira cu A.B. tabatin contacto cu esnan di e boto.
Hues ta haya cu A.B. a coordina e importacion y como tal A.B. ta complice di importacion.
CASTIGO DI 4 AÑA DI PRISON
Pa cu e castigo, Hues a bisa cu e ta tene cuenta cu A.B. a yuda den traficacion di droga cu ta afecta salubridad di comunidad y fomenta criminalidad.
Hues a tuma na malo cu A.B. a haci esaki pa gana placa. Ademas cu anterior dos biaha caba A.B. a wordo condena pa droga. Hues a bisa cu el a tene cuenta cu orientacion di sentencianan di Corte Superior y a condena A.B. na 4 aña di prison y e cellularnan ta keda confisca.
