Mundo ta practicamente digitalisa,despues di Corona Virus, hende a keda separa for di otro, door di varios anja hende no por aserca otro pa evita di pega cu e virus cu a causa hopi morto riba mundo. Cu te dia di awe, no tin un cifra exacto cuanto hende a muri.
Awor nos comunicacion a bira mas digital, nos ta Whatsup, Voicemessage, pero esaki no ta e comunicacion berdadero, comunicacion berdadero ta ora nos papia cu otro cara cu cara, mira otro, brasa otro, duna otro un man, sinti cu di berdad nos a topa y especialmente wak e estado fisico di e persona cu bo kier a mira, anto asina ey bo por bisa mi a mire y e ta mustra bon.Pasobra di pafo bo ta mira pero di paden ningun hende sa, ta Dios so sa.
Comunicacion den Famia ta algo di balora, pasobra ta keda masha mahos, ora hende ta biba hunto y nan no ta comunica,of nan ta asina dividi, cu ningun por contesta pa otro, den un sentido cu hasta nan no por bisa si un ta na cas of no.
Tin hende ta kere cu ora nan ta dividi, ta sabi nan ta of ta asina ta moda di biba awendia, den cual un ruman cu ta biba den cas cu otro, ta bisa bo cu e no sa di su ruman, e no ta deal cu su ruman, of ami ta bon, no puntrami pa mi ruman, e contestanan ey a bira masha na moda, pero e ta demostra un bida bruha, caminda tin discucion y falta di pordon.
Mas fuerte ta ora relacion entre mayor y yiu ta debilita of casi no ta existi,caminda mayor no ta atende cu mayor of mayor no ta atende cu yiu, pasobra ningun hende no kier wordo coregi, y ningun hende no kier pidi despensa.
Pero e palabra di Dios ta recorda nos den Filipensenan 4:8-9 bisando: Finalmente, rumannan,tur loke ta berdadero,tur loke ta honorabel,tur loke ta husto,ur loke ta puro,tur loke ta bunita,tur loke ta di bon fama,sin tin algun birtud,y si tin algo digno di alabansa,laga esaki ocupa boso mente. E cosnan cu boso a sinja, y a ricibi y a tende y a mira den mi, practica e cosnan aki, y e Dios di pas lo ta cu boso.
Practicando locual e palabra di Dios ta bisa, nos lo crea relacion fuerte den famia, nos matrimonio lo ta fuerte, nos yuinan lo ta fuerte, y lo exist e berdadero union manera Dios kier pa nos ta uni, pa asina Dios por derama su bendicion riba henter e hogar.
Laga boso palabra ta semper cu gracia,sasona cu salu,pa boso por sa con boso mester contesta cada persona. ( Colosensenan 4:6).
No laga ningun palabra danjino sali for di boso boca,sino palabra cu ta bon pa edificacion, conforme e necesidad di e momento,pa esaki duna gracia na esnan cu ta tende.( Efesionan 4:29).
Tur e articulo moderno cu tin pa comunica , no mester separa hende personalmente for di otro, nos mester sigi bishita otro , especialmente nos grandinan y esnan cu no por move facilmente.
Nos mester preserva pas y biba na pas cu otro, nos mester pordona otro, mescos cu Dios a pordona nos,laga nos bisti amor cual ta e laso perfecto di unidad.
Laga e pas di Cristo goberna boso curason,asina nos ripara cu cierto palabra of actitud ta hiba nos den caminda di desunion, nos mester usa sano huicio y corta mesora cu esey.
Comunicacion den famia, ta nifica amor, comprension, pordon,y mas cu tur cos, pas.
Sinceramente, Pastor Marcel Balootje
