Durante su bishita oficial na Hulanda, diamars atardi Prome Minister di Aruba, mr. Mike Eman, a reuni cu Minister di Enseñansa, Cultura y Ciencia di Hulanda, Rianne Letschert. E encuentro enfoca riba fortalece cooperacion den e area di cultura, patrimonio historico y enseñansa.
Durante e reunion, ambos mandatario a intercambia pensamiento riba e importancia di cultura y patrimonio como base fundamental pa identidad nacional, formacion di comunidad y desaroyo sostenibel p’e futuro generacionnan.
Prome Minister Mike Eman a indica cu durante e encuentro a dedica atencion special na diferente oportunidad pa amplia y fortalece cooperacion cultural entre Aruba y Hulanda.
Segun e Prome Minister “Nos a enfoca hopi riba e tema di cultura. Nos a dialoga hunto tambe cu representante di Monumentenfonds. Nos ta conta hopi riba diferente fondo na Hulanda pa restauracion di varios edificio historico, y nos ta bin pa consolida e cooperacionnan aki, pero tambe pa expande e cooperacion entre e ministerionan.”
Prome Minister Eman a enfatisa cu Gobierno di Aruba ta mira preservacion di patrimonio historico y cultural como un elemento esencial den construccion di identidad nacional y den fortalece conocemento y conciencia historico den comunidad.
Tambe e Prome Minister a expresa su aprecio p’e apertura y compromiso cu Minister Letschert a mustra pa sigui contribui na e esfuerso comun aki. “E minister ta hopi determina pa contribui. E ta bin Aruba na november y nos a extende invitacion. Nos ta sinti cu realmente tin deseo pa contribui den un forma hopi consistente.”
Di su banda, Minister Letschert a expresa cu e reunion a confirma e balor di cooperacion entre Aruba y Hulanda den e area di cultura y enseñansa. “Nos a tene un conversation hopi positivo tocante loke ta conecta nos den nos ambicionnan riba cultura, patrimonio cultural y tambe enseñansa.” Minister Letschert a enfatisa cu preservacion di cultura y patrimonio ta exigi compromiso y accion continuo. “Bo kier preserva e forma tradicional di cultura cu ta existi riba bo isla, of den mi caso na Hulanda. Pero pa logra esey, mester haci un esfuerso. Esaki no ta bay automaticamente.” E minister Hulandes a expresa admiracion pa e diferente iniciativa cu Aruba a desaroya pa conserva y fortalece cultura Arubiano p’e futuro generacionnan.
“Prome Minister a splica hopi bon e iniciativa nan cu Aruba tin pa preserva cultura Arubiano y mantene esey bibo p’e futuro generacionnan.” Segun Minister Letschert, e cooperacion entre Aruba y Hulanda ta crea un oportunidad valioso pa ambos paisnan siña mas di otro y sigui construi riba conocemento comparti. “Mi ta mira esaki como un oportunidad real pa nos siña uno di otro.”
Gobierno di Aruba ta considera e encuentro aki un paso importante den fortalece e cooperacion institucional dentro di Reino. E dialogo entre ambos ministerio lo continua den luna di november, ora Minister Letschert bishita Aruba pa sigui profundisa cooperacion y desaroya diferente iniciativa den area di cultura, cuido di patrimonio historico y enseñansa.
