Canada a inclui dialuna su strea principal, Alphonso Davies, den e lista di 32 hungado convoca pa e concentracion previo p’e Mundial di 2026. Sinembargo, e seleccionador Jesse Marsch a admiti cu e defensa no lo ta cla pa e partido inaugural di e torneo contra Bosnia y Herzegovina dia 12 di juni.
Marsch a declara dialuna cu e ta spera cu Davies por hunga “den algun momento” di e Mundial, maske el a señala cu e capitan Canandes no lo yega na tempo pa e debut di e seleccion anfitrion. E tecnico a agrega cu e hungado di Bayern Múnich no lo uni mesora na e concentracion na e localidad Mericano di Charlotte, North Carolina, locual a cuminsa dialuna, sino cu lo uni na e grupo dia 31 di mei na Edmonton.
Federacion Canandes di Futbol (Canada Soccer) a declara cu e grupo lo reuni entre dia 25 y 29 di mei na Charlotte, prome cu Marsch devela e convocatorio definitivo pa e Mundial dia 29 di mei proximo den un programa special di television. Canada Soccer a splica cu, pa motibo di lesion y compromiso cu clubnan, e futbolistanan lo incorpora progresivamente den coordinacion cu nan respectivo club y cuerpo medico, priorisando e condicion fisico di e hungadonan.
Davies, di 25 aña, a pasa den un periodo largo marca pa problemanan fisico. E lateral a sufri den luna di maart un lesion muscular cu a strob’e di hunga partidonan di amistad cu Canada, y a cay den relapse dia 8 di mei cu un lesion nobo na su hamstrings mientras e tabata hunga cu Bayern.
Davies ta figura den un convocatorio cu ta inclui tambe hungadonan manera Jonathan David, Cyle Larin, Stephen Eustáquio, Tajon Buchanan y Alistair Johnston. Canada lo hunga dos partido di preparacion prome cu e torneo: contra Uzbekistan dia 1 di juni na Edmonton y contra Irlanda dia 5 di juni na Montreal. E seleccion Canandes ta den Grupo B di e Mundial hunto cu Bosnia y Herzegovina, Qatar y Suisa, y nan partidonan di fase di grupo lo wordo hunga dia 12 di juni na Toronto, y dia 18 y 24 di juni na Vancouver.
