Seleccion di Portugal a concentra diamars aki riba fineza di nan tactica cu bista riba e Mundial 2026 y e partido di preparacion contra e seleccion di Chile, programa pa dia 6 di juni proximo den e canan di Lisboa.
E ekipo capitania pa Cristiano Ronaldo a bolbe na e canchanan di e Ciudad del Futbol, un compleho situa na Oeiras, den e area metropolitano di Lisboa. E biaha aki e entrenamento a wordo enfoca riba e wega cu bala, despues cu dialuna nan a inicia e preparacion pa e Copa di Mundo cu un sesion dedica principalmente na recuperacion fisico den gym.
Mismo cos cu ayera, e seleccionador Spaño Roberto Martinez a conta cu tur su hungadonan, cu excepcion di Vitor Machado ‘Vitinha’, Nuno Mendes, Joao Neves y Goncalo Ramos. E hungadonan aki a conkista Champions League cu Paris Saint-Germain (PSG) diasabra pasa y lo uni na e ekipo algun dia despues di e partido contra Chile.
Prome cu e entrenamento, den un rueda di prensa, e portero Ricardo Velho a sigura cu “e grupo ta uni” y a descarta cualkier tipo di sobrecarga fisico entre e hungadonan di Portugal.
“Nos ta semper cla pa representa nos pais. Nos lo duna tur cos pa ta prepara,” e kiper di e club turco Genclerbirligi a declara. El a agrega tambe: “E ta un grupo fantastico, semper hopi uni, y sin duda nos lo haci un gran Mundial.”
Portugal lo tin su prome test diasabra proximo contra Chile. E dos ekiponan aki no a enfrenta otro desde aña 2017, na momento cu e seleccion Sudamericano a gana den e tanda di penal den semifinal di e Copa Confederaciones.
E partido aki contra e combinacion chileno lo yuda e cuadro Portugues pa prepara pa e estilo di futbol cu nan lo topa den e grupo K di e Mundial, caminda nan lo midi forsa contra Colombia, Uzbekistan y e Republica Democratica di Congo.
Prome cu nan biaha pa e Copa di Mundo na Mexico, Merca y Canada, Portugal lo tin un otro partido amistoso dia 10 di juni contra Nigeria.
