Dialuna a constata cu e espacio na Hospital cu ta wordo uza pa prepara cierto medicamento no ta adecuado mas pa prepara dicho medicamento. Inmediatamente, den cooperacion entre Hospital y Gobierno a logra pa medicamentonan cu ta wordo prepara den e espacio aki por wordo prepara na un Botica local, mientras cu un otro parti lo wordo prepara cu sosten di CMC Corsou. E medicamentonan cu lo wordo prepara na Corsou lo wordo transporta pa Aruba cu cooperacion di Douane di Aruba y Corsou y tambe Inspectie Volksgezondheid.
E espacio aki no por wordo uza mas. Sin embargo, tin un espacio nobo cu lo mester wordo entrega entrante augustus di e aña aki.
E espacio ta parti di diferente facilidadnan cu mester wordo traspasa den e proceso di finalisacion di renobacion y ampliacion di e edificio di Hospital cu a inicia desde 2013. Ainda tin componentenan pendiente. Gobiernonan no a finalisa esaki.
Desde cu e Gobierno actual a huramenta, e Minister encarga cu Salubridad Publico, Asunto Social, Cuido di Adulto Mayor y Maneho di Adiccion, ta na mesa di dialogo cu Hospital y SOGA pa yega na traspaso di e espacionan pendiente. A habri e entrada principal y a finalisa diferente parti di Hospital.
Tambe a firma un timeline pa e proceso sigui avansa. Como parti di esaki tin intencion pa e espacio nobo pa prepara medicamento wordo finalisa y entrega na augustus di e aña aki.
Mientrastanto, den deliberacion entre Horacio Oduber Hospital y CMC Corsou, a logra un solucion temporario pa por tin continuidad di e servicio.
Pueblo por ta trankil cu a tuma e medidanan necesario pa garantisa seguridad y calidad den reparacion di medicamento.
Ta di importancia pa cuido medico di calidad wordo salvaguardia. Esey ta compromiso cu nos Gobierno tin cu pueblo di Aruba.
