E prome edicion di “RESPIRA + RECONECTA + RELAHA” a culmina cu exito, marcando un inicio significativo di un programa dedica na bienestar di tur profesional den veld di enseñansa.
E iniciativa, lidera pa Ministerio di Educacion y ehecuta pa IBiSA, cu apoyo di partnernan manera Moore Bida y otro colaboradornan local, a ofrece un serie unico di experiencianan enfoca riba bienestar fisico y mental.
E edicion aki a consisti di tres caminata special: Luna Yen na Natural Bridge, Salida di Solo na Anker Blauw – Sero Colorado, y Bahada di Solo na Lighthouse. Durante e trayecto, educadornan a haya espacio pa cana, medita y reconecta cu nan mes den medio di naturalesa.
Minister di Educacion, sra. mr. Gerlien Croes, a expresa su gratitud na tur educador cu a participa: “Pa tur educador cu a forma parti di e edicion aki — danki. Boso participacion a haci esaki un experiencia realmente special”.
Ministerio di educacion ta reconoce e importancia di iniciativa manera esaki pa fortalece bienestar, motivacion y resiliencia den veld di enseñansa, y ta anima tur esnan cu no a participa pa keda pendiente pa e siguiente edicion.
Gobierno di Aruba ta reafirma su compromiso pa sigui inverti den bienestar di su educadornan, reconociendo nan como columna fuerte di futuro di nos pais.
