E parkeerplaats di Paseo Herencia na Palm Beach a bira un di e principal centro di colecta na Aruba pa reuni ayudo humanitario pa Venezuela. Dialuna atardi, Prome Minister Mike Eman a bishita e iniciativa pa mira di cerca e gran cantidad di boluntario cu ta trahando pa sorteer, paketa y prepara e donacionnan cu lo transporta pa e area cu a wordo afecta pa e temblor fuerte di diaranson ultimo na Venezuela. Durante e bishita, e Prome Minister a haci un recorido den e diferente area di e centro di colecta, unda e boluntarionan tabata sorteer alimento, awa, producto di higiene, medicina y otro articulo di prome necesidad.
Segun Orlando Garcia, comerciante Venezolano y doño di Caribbean Printing, e iniciativa a cuminsa apenas algun ora despues di e tragedia.“Apenas 12 ora despues di e tragedia nos a reuni y haci un yamada na nos clientenan, amigo y proveedor pa cuminsa un accion humanitario. Awe nos ta yega cerca di 100 palet y esaki ta danki na e respuesta di henter pueblo di Aruba.” Garcia a destaca cu e accion ta un esfuerso conhunto di comerciante Venezolano estableci na Aruba, cu a logra moblisa nos comunidad di diferente nacionalidad. “Aruba awe ta nos tur. Den cada caha tin un aporte di Arubiano, Venezolano, Chines, Colombiano y hopi otro nacionalidad. Tur hende a pone nan man hunto.” Segun Garcia, e prome cargamento lo sali rumbo na Venezuela, pero e colecta lo continua mientras e necesidad persisti.
Durante e bishita, Prome Minister Mike Eman a destaca cu, segun e informacion cu Gobierno di Aruba ta ricibi directamente for di e ekipo medico Arubiano cu ta na Venezuela, remedi ta un di e necesidadnan mas urgente. “Nos ta aprecia tur loke comunidad ta reuni, pero remedi ta hopi importante. Nos ekipo medico a informa cu e stock di remedi a baha hopi lihe. Cuminda, awa y producto di higiene tambe ta sigui indispensabel” E Prome Minister a expresa tambe su speransa cu tur instancia competente lo sigui facilita e transporte di e ayudo pa logra cu e mercancia yega mas liher na e famianan cu mester dje. Mas cu e cantidad di donacionnan, Prome Minister Eman a destaca e espirito di solidaridad cu Aruba ta demostrando. “Mi ta sinti un emocion special ora mi ta mira con nos pueblo ta responde. Hende di diferente nacionalidad ta uni cu amor y solidaridad pa yuda otro ser humano. Esaki ta algo hopi bunita y algo cu nos por ta orguyoso di dje.”
Entre e decennan di boluntario tabata Dulce Perez, kende a comparti cu emocion cu el a perde un familiar durante e temblor fuerte na Venezuela.
A pesar di su dolor, Perez a scoge pa dedica su tempo pa organisa y sorteer e donacionnan.
“Mi ta hopi conmovi. Tur e apoyo cu nos ta ricibi ta duna hopi speransa. Mi kier gradici henter comunidad di Aruba pa nan solidaridad den un momento asina dificil.”
Antonella Coronel, un hoben boluntario di Parlamento Hubenil, a indica cu pa e como hoben, participa den e iniciativa ta un manera concreto di yuda e pueblo Venezolano.
El a haci un yamada pa mas hobenan y comunidad sigui aporta, specialmente cu producto pa baby, manera pamper y remedi, cu segun e organisadornan ta entre e articulonan cu mas tin falta di dje.
Actualmente, e centro di colecta den e parkeerplaats di Paseo Herencia ta sigui recibi donacion mientras e boluntarionan ta prepara e siguiente cargamento rumbo pa Venezuela. Gobierno di Aruba ta continua coordina cu diferente partner local y internacional como tambe sigui monitor e situacion di cerca pa identifica con por sigui apoya e esfuerso humanitario pa yuda Venezuela.
