Diabierna mainta, envez di a dicta sentencia, Hues a bisa cu e ta habri investigacion den e caso penal contra e homber Colombiano O.D.P. (36). Fiscal ta acusa O.D.P. , cu dia 27 December 2025 a dal dos peaton turista cu auto y core bay. E dama Wernet a fayece algun siman despues den hospital.
SOLO DI PUEBLO por a compronde cu Hues a instrui Fiscal pa busca mas informacion y tambe Hues a instrui Hues Comisario pa interoga e yiu muher di e victima. Hues kier mas informacion pa asina por tuma un decision.
Tratamento di e caso a tuma lugar 12 Juni 2026, caminda Fiscal a acusa O.D.P. di morto door di culpa. Fiscal a acusa O.D.P. di tabata core auto bou influencia di alcohol, no a paga tino riba aminda, a core sin luz y a core cu glas getint scur. Esaki a causa cu el a dal e dos personanan cu tabata cana riba caminda y despues a core bay.
Awe mainta, via video conference, e yiu muher di e victima, M.Rodriguez tabata scucha Hues.
Ta asina cu dia 12 Juni 2026, Fiscal a exigi 3 aña di prison y 4 aña sin rijbewijs pa O.D.P. Tambe Fiscal a bisa cu e cellular lo debolbe na O.D.P. pero e auto mester keda confisca.
HUES KIER MAS INVESTIGACION
Awe mainta Hues a bisa cu e no a yega na un conclusion ainda. El a mustra cu e acusacion ta morto door di culpa. Hues a bisa cu kier mas informacion pa asina por dicidi si O.D.P. ta culpabel di e acusacionnan.
Hues a mustra cu no tin informacion kico tabata e causa di morto di e dama Wernet, kende dos siman despues di e accidente, 13 Januari 2026 a fayece.
MESTER SCUCHA E OTRO VICTIMA
Tambe Hues kier sa kico ta e motibo di e accidente. Hues a mustra cu e acusacion ta mustra cu O.D.P. no a mira e dos turistanan pero den Corte O.D.P. a bisa cu el a mira nan. Hues kier pa scucha e yiu di victima Wernet, e dama Rodriguez.
Hues a bisa cu e ta instrui Hues Comisario pa scucha e dama Rodriguez. Hues a instrui Fiscal pa haya e informacionnan di causa di morto di e dama Wernet.
Na opinion di Hues, ainda e no por tuma decision si O.D.P. por wordo laga liber. Hues a bisa cu tin motibo di peso. Esey ta haci cu O.D.P. ta keda encarcela te ora cu tin un sentencia. Hues a bisa cu dentro di 4 luna lo por ta cla. Tur cos ta depende con liher por scucha e dama Rodriguez. Unavez cu Hues haya e informacionnan cu el a ordena, e lo por tuma un decision.
