E reunion publico den Parlamento cu tabata programa pa dialuna 6 di juli, unda lo a trata e contract entre Aruba Tourism Authority (ATA) y un empresa priva pa e Zona di Desperdicio Permanente na Barcadera, a keda posponi te proximo aviso. Lastimamente, e Minister di Turismo, Transporte y Labor, sr. Wendrick Cicilia, a scoge pa cancela e reunion aki sin duna un fecha nobo y sin duna ningun motibo pa e decision aki.
Fraccion di MEP tabata cla pa tuma palabra den e reunion aki pa pidi claridad absoluto di e mandatario. E decision di e minister pa pospone e reunion sin splicacion ta lanta mas duda riba un proyecto cu for di principio a wordo cuestiona pa su falta di transparencia.
Un lansamento sin consulta ni transparencia
E proyecto en cuestion a wordo lansa dia 20 di mei 2026 door di Minister Cicilia hunto cu e directora di ATA, sin cu a haci un consulta publico y sin a informa Parlamento previamente. Ademas, un punto cu a lanta hopi atencion ta cu e Minister di Infrastructura, Energia y Telecomunicacion, sr. Herdé, kende segun e reparticion oficial di carteranan ta e minister formalmente responsabel pa e maneho di desperdicio, no tabata presente na e lansamento y tampoco no a firma e contract aki.
Alerta di Rekenkamer riba control di fondonan publico
E cancelacion inespera aki ta tuma luga den un momento crucial. Dia 8 di mei 2026, Algemene Rekenkamer di Aruba (ARA) a publica su rapport “Buiten beeld, buiten controle”,
den cual e organo independiente aki a conclui cu mas di 100 miyon florin di placa di pueblo ta funcionando “fuera di bista y fuera di control” di Parlamento.
E Rekenkamer a constata cu eficiencia ta wordo uza regularmente como argumento pa desvia for di proceduranan regular di transparencia y supervision, y cu esey ta “bestuurlijk onjuist” y ta contrario na articulo V.19 di e Staatsregeling di Aruba. Esaki ta significa cu Parlamento legalmente tin derecho na informacion completo y na tempo riba tur gasto di placa publico. E rapport a señala tambe cu den algun caso, gobierno ta informa miho na financiadonan Hulandes y Europeo cu na su propio Parlamento.
Preguntanan sin contesta
Den e contexto aki, Fraccion MEP a presenta formalmente un serie di cuestionamento, consistiendo di 28 pregunta na Minister Cicilia y 25 pregunta na Minister Herdé entre dia 21 y 22 di mei 2026. E preguntanan aki ta relaciona cu e proceso di seleccion di e empresa cu a haya e contract, e fuente di financiamento den e presupuesto di ATA, e structura di supervision (toezicht) y responsabilidad, y e relacion cu e contratonan existente cu Serlimar pa e maneho di desperdicio na Aruba.
Awor cu e reunion a keda posponi pa tempo indetermina door di Minister Cicilia, e preguntanan aki, cu ta publicamente disponibel via Parlamento di Aruba, ta keda temporalmente sin contesta den e sala di Parlamento. Fraccion di MEP lo sigui vigila e desaroyo aki di cerca y lo sigui exigi e transparencia y duna e pueblo e contesta cu e merece.
