Diamars14 di juli 2026, Parlamentarionan Evelyna Wever-Croes y Rocco Tjon, a entrega un peticion formal na Minister di Turismo, Transporte y Labor, Wendrick Cicilia, basa riba e Landsverordening openbaarheid van bestuur, LOB. Mediante e peticion aki, nan ta exigi transparencia total y acceso na tur documento relaciona cu e proyecto di maneho di desperdicio na Aruba den cual Aruba Tourism Authority, ATA, tabata envolvi.
Segun e dos parlamentarionan, durante un reunion anterior caba nan a pidi pa haya bista den e documentonan. Pero te cu awor nan no a ricibi nada. Pa e motibo aki, nan a opta pa haci un apelacion formal pa gobierno pone tur e informacion aki disponibel.
E Rol di ATA y e Base Huridico
E peticion ta enfoca riba e rol di ATA den e proyecto. Wever-Croes y Tjon ta pidi copia di tur carta, e-mail y memo unda gobierno a pidi ATA pa inicia e proyecto di desperdicio. Ademas nan kier mira tur notulen , acta y decision di reunionnan entre ATA y gobierno riba e tema aki. Tambe nan ta pidi pa mira e RFP-nan, “Requests for Proposals”, cu ATA lo a manda pa Serlimar y Ecotech, y tur propuesta ricibi di e companianan aki y di otro partidonan envolvi.
Un punto importante ta e base huridico. E parlamentarionan ta pidi tur conseho huridico y documento unda ta evalua si ATA tin autoridad pa firma un contract cu un empresa priva pa maneho di desperdicio, fuera di su tareanan normal di promocion di turismo.Nan tambe ta pidi pa mira tur rapport di evaluacion, matrix di puntuacion y e decision final pa duna e proyecto na e compania cu a gana.
Formato Digital y Plaso Legal
Den nan carta nan a pidi pa ricibi tur documento digital, den formato PDF, via e sistema oficial. Den caso cu tin cierto informacionnan cu no por ta publico, nan ta pidi pa Minister duna un splicacion pa cada documento, specificando den cua articulo di LOB e ta basa su mes pa keda sin duna e informacion. Ademas, e parlamentarionan ta pidi pa confirma ricibimento di e peticion y pa e Minister contesta dentro di e tempo legal di un LOB-verzoek.
E maneho di desperdicio a bira un punto di discusion hopi fuerte den Parlamento den e ultimo lunanan. Cu e peticionn aki, Wever-Croes y Tjon kier trece claridad riba con e decisionnan, e seleccion y e contract a tuma luga via di ATA. Te na e momentonan aki, Minister Cicilia no a reacciona ainda.
