Pashentnan di Aruba (PDA) ta anuncia cu orguyo cu señora Siomara Everon a acepta e rol di Embahadora di Salud y Salud Mental di nos movemento civico.
PDA ta un centro di e fundacion sin fin di lucro SIKI y ta boga pa empoderamento di hende, pa nan por conoce nan derechonan, haci nan bos wordo scucha y participa activamente den decisionnan cu ta afecta nan bida.
Siomara ta conoci pa publico Arubiano como un specialista den media publico, presentadora di television y un cara familiar cu durante añanan a drenta cas y curason di hopi hende. Pero tras di e profesional, tin un hende cu su historia personal a bira un simbolo di sobrevivencia, fortalesa y bunitesa den resiliencia.
Hunto cu su yiu, Siomara a mustra cu, aunke bida por pone un hende dilanti di dolor, incertidumbre y pruebanan grandi, semper tin un caminda pa bolbe lanta. Su historia no ta solamente uno di sobrevivencia, sino tambe di amor, dignidad y e curashi pa sigui dilanti.
Pashentnan di Aruba ta sumamente orguyoso cu Siomara lo bira un voz mas pa pashentnan, famianan y cuidadornan cu tin mester di wordo scucha. Como Embahadora di Salud y Salud Mental, e lo contribui pa kibra silencio, crea comprension y trece mas humanidad den e combersacion tocante cuido na Aruba.
E nombramento di Siomara a wordo anuncia inicialmente dia 17 di juni durante e programa Nos Mainta. PDA a dicidi warda cu e anuncio oficial te ora cu nos plataforma digital, www.pashent.org, a bira un realidad cu por ricibi e storia y bos di pueblo.
Awor e momento a yega.Pashentnan di Aruba ta invita tur pashent, persona, familiar y cuidado pa bishita www.pashent.org y yena nos encuesta. E encuesta por wordo yena completamente anonimo. Bo no mester menciona bo nomber y bo informacion personal no ta necesario.
Bo experiencia ta conta. Cada historia por yuda nos identifica unda e sistema di salud ta funciona, unda e ta faya y unda cambio ta urgente. E informacion cu nos ricibi lo yuda PDA lucha pa un cuido di salud mas miho, mas humano, mas sigur y mas respetuoso.
Siomara lo ta un bos pa pashentnan. Pero e cambio cu nos ta busca mester cuminsa cu bo bos tambe.
Bishita www.pashent.org. Yena e encuesta. Conta bo historia.
Bo bos ta conta.
