CEDE Aruba, Bario Unico y e centronan di bario di Aruba ta uni forsa pa sostene Dia Nacional pa Cuida Aruba, cu lo tuma luga diasabra 25 di juli. Pa apoya e iniciativa nacional aki y facilita participacion di comunidad, lo tin saco di sushi gratis disponibel pa personanan cu kier contribui na e meta di haci Aruba un lugar mas limpi y bon cuida pa nos tur. E personanan interesa por pasa libremente na e centronan di bario indica abou riba diahuebs 23 di juli y diabierna 24 di juli, entre 8:00 a.m. y 5:00 p.m., pa busca saco di sushi y prepara nan mes pa e gran accion di limpiesa di diasabra.
E saconan ta disponibel na:
- Centro di Bario Lago Heights
- Centro di Bario Brazil
- Centro di Bario Dakota
- Centro di Bario Playa Pabao
- Centro di Bario Noord
- Fundacion Centro Famia Piedra Plat
CEDE Aruba, Bario UNiCO y e centronan di bario ta invita famia, bisiña, grupo, club y organisacion pa participa. Cada persona por contribui na su propio cas, bario of comunidad. Cada saco yena y cada espacio limpia ta un paso den direccion di un Aruba mas bunita. Ban Cuida Aruba! Pasa busca bo saco di sushi gratis, prepara bo mes y uni bo forsa cu henter comunidad.
Dia Nacional pa Cuida Aruba
Dia Nacional pa Cuida Aruba ta un iniciativa di Gobierno di Aruba cu ta busca fortalece responsabilidad comparti den cuido di nos isla. Bou di e lema “P’ami. P’abo. Pa nos tur.”, e campaña ta invita ciudadano, empresa, scol, club, fundacion y organisacion pa uni forsa durante un gran accion nacional di limpiesa riba diasabra 25 di juli. Ademas di limpia diferente area rond Aruba, e iniciativa tin como meta crea mas conscientisacion cu cuido di nos entorno ta responsabilidad di nos tur. Un Aruba limpi y bon cuida ta cuminsa cu compromiso y accion di cada ciudadano. Pa mas informacion subi www.arubatanostur.com
