Prome Minister Mike Eman awe a reuni cu e ploegnan di Servicio di Limpieza di Aruba (Serlimar) na Kockstraat, San Nicolaas, den preparacion pa Dia Nacional pa Cuida Aruba, cu lo tuma luga riba 25 di juli. Ayera el a reuni cu e ploegnan di Departamento di Obra Publico (DOW). Durante e bishita, Prome Minister a gradici tur e trahadornan di Serlimar pa nan dedicacion diario pa tene Aruba limpi. El a reconoce cu e ploegnan ta haci un esfuerso grandi tur dia, hunto cu e ploegnan di DOW, Tourism Product Enhancement Fund (TPEF) y otro servicionan, pero cu e atraso den limpieza di Aruba ta un reto demasiado grandi pa nan enfrenta nan so.
Prome Minister a indica cu e ploegnan ta traha duro tur dia, pero cu pa logra pone Aruba limpi, ta necesario pa henter comunidad uni forsa. Ta for di e necesidad aki e idea a nace pa organisa Dia Nacional pa Cuida Aruba. Gobierno ta invita sector priva, e organisacionnan, e scolnan, e clubnan y tur ciudadano pa sali riba 25 di juli y contribui na cuido di nos isla. E iniciativa no ta solamente pa haci Aruba limpi durante un solo dia. E meta ta pa revive e sentido comunitario y crea mas responsabilidad pa cuido di nos barionan, nos cayanan y e diferente espacionan publico.
Prome Minister a enfatisa cu cada barro por haci un diferencia ora e bisiñanan sali hunto pa limpia rond di nan cas y cuida e spacionan publico den nan bario. Esaki lo yuda e ploegnan di Serlimar pa por concentra nan trabou riba e areanan cu realmente ta necesita mas atencion. Tambe el a haci un yamada pa presta atencion na e bisiñanan cu mester un man di ayudo. Por ehempel, yuda un persona grandi haci su cura limpi of transporta desperdicio ta forma parti di e cooperacion y sentido comunitario cu semper a caracterisa nos Arubianonan. Michel Henriquez Director di Serlimar a expresa nan apoyo na e iniciativa y a confirma cu nan ploegnan lo pone nan maximo esfuerso pa contribui na Dia Nacional pa Cuida Aruba. Nan a enfatisa cu nan ta traha duro tur dia, pero cu cooperacion di comunidad ta indispensabel pa logra un Aruba mas limpi.
Prome Minister a conclui cu un invitacion na tur compania y organisacion cu por aporta cu personal, mashin of ekipo pa uni nan na e esfuerso nacional. El a gradici e comision organisado, e boluntarionan y tur e partnernan cu caba a confirma nan participacion. Entre e organisacionnan cu lo participa ta Marinierskazerne Savaneta, cu lo pone personal disponibel pa yuda haci un area recreativo y deportivo den bario di Mabon. Prome Minister a expresa su speransa cu mas organisacion y ciudadano lo uni nan riba 25 di juli pa traha hunto pa cuida Aruba.
