Prome Minister Mike Eman diahuebs mainta a duna un discurso oficial di bonbini durante e apertura di 13th Annual Called to Wealth International Summit, teni na The St. Regis Aruba Resort. E conferencia internacional, organisa pa Kingdom Chamber of Commerce, a reuni e lidernan di gobierno, comerciante, inversionista, ehecutivo y e lidernan spiritual for di diferente pais pa intercambia pensamento riba liderazgo, innovacion y desaroyo economico sostenibel. Prome Minister Mike Eman a wordo ricibi pa Dr. K. Angela Pipersburgh, fundadora y presidente di Kingdom Chamber of Commerce.
Den su discurso, Prome Minister Eman a comparti cu e ainda ta corda claramente e bishita cu e lider spiritual di renombre mundial, Dr. Myles Munroe, a haci na Aruba na aña 2011. E a relata con un di e mensahenan cu mas a resalta tabata ora Dr. Munroe a papia cu un gran grupo di hende tocante e significado di ta un “stranhero” na Aruba. Segun Eman, Dr. Munroe a recorda e presentenan cu, si un persona ta na Aruba, ta pasobra Dios a kier cu e persona ey ta aki. E mensahe ey, segun e Prome Minister, ta sigui relevante te dia di awe, pasobra e ta recorda nos cu tur hende tin un proposito y cu nos mester trata otro cu respeto, aceptacion y dignidad. Prome Minister Eman a remarca cu Aruba semper a caracterisa pa su apertura y tolerancia. Durante hopi generacion, hende di diferente nacionalidad, cultura y religion a haci Aruba nan cas y hunto nan a contribui na desaroyo di nos isla. E a enfatisa cu precisamente e balornan di respet mutuo, convivencia y union ta net locual mester sigui guia nos comunidad. Prome Minister Eman tambe a comparti un otro pensamento cu Dr. Munroe a laga na dje personalmente: e invitacion pa “laga e mundo bashi”, uzando tur bo talento, conocemento, experiencia y energia den servicio di otro. Segun Eman, e filosofia aki ta un recordatorio cu berdadero liderazgo ta basa riba duna lo miho di bo mes na servicio di otro y contribui na un futuro miho pa e siguiente generacion.
Durante e encuentro, Prome Minister Eman a presenta na Dr. Pipersburgh un ehemplar di e buki Volk van Veerkracht, publica den conexion di 40 aña di Status Aparte y 50 aña di Himno y Bandera. E a splica cu e buki ta comparti un reflexion riba e desaroyo di Aruba durante e ultimo decada y cu e ta dedica na memoria di e prome Prome Minister di Aruba, Henny Eman.
Na final di su discurso, Prome Minister Eman a duna un bonbini na tur e delegadonan cu a bishita Aruba y a expresa su aprecio pa e oportunidad di intercambia pensamento cu e lidernan den comercio y e lidernan spiritual for di diferente parti di mundo. E a resalta cu liderazgo basa riba balor, colaboracion y servicio ta indispensabel pa sigui traha pa un futuro prospero y sostenibel.
Despues di e discurso, Dr. K. Angela Pipersburgh a expresa su gradicimento pa presencia di Prome Minister Eman y a haci un oracion, pidiendo bendicion, sabiduria y guia di Dios pa e Prome Minister, su famia y pueblo di Aruba.
