Hopi biaha nos por bisa un hende algo, y hopi ta bisa, e ta duro, esun cu ta predica ta predica fuerte,pero ta miho ta e mes lese y saca su conclusion.
Cuanto biaha bo ta tende hende ta bisa cu nan no ta bay cierto iglesia pasobra e pastor ta predica fuerte y ta bisa e cosnan direct, pero nan ta lubida cu trabao di un pastor ta pa predica mas sincero cu ta posibel, sin complacencia, sin compincheria, sin favoritismo, sin acepcion di persona, pasobra Dios no kier pa hende cambia ni trose Su palabra.
Kico Proverbionan 19:18 ta nifica?
Na prome lugar e ta papia di disiplina, disiplina no ta nifica bati mucha , ni tampoco maltrata un mucha, pero e ta nifica instrui e mucha riba bon caminda,y pa instrui un mucha , nos mester tin tempo pa e mucha, pasobra instruccion di mayor mester ta personal, sinta banda di bo yiu, den un combersacion, no un discucion cu palabra malo, pero un instruccion yena cu encurashamento, caminda abo como mayor ta separa bon for di malo y instrui esey na bo yiu.
E Proverbio ta papia hopi cla na tur mayor, y especialmente tur esnan cu ta den liderasgo mester papia un palabra; Disiplina bo yiu mientras cu tin speransa ainda, y no ta desea su morto.
Den un palabra bisa disiplina mester cuminsa for di chikito, pasobra ora mucha bira grandi e no ta scucha mas.
Tur hende ta stima nan yiu, pero a yega e momento pa nos samina nos mes y puntra , mi ta bezig cu amor of mi ta bezig cu malcriansa.
Pasobra cumpra un mucha su curason cu regalo, y lage haci manera e kier, por ehempel e ta tira su cosnan den cas y abo como mayor ta cana piki nan y no ta bise nada , no ta amor ta malcriansa, lage sali y bin cas ora cu e kier, no ta amor ta malcriansa.
Amor ta instrui e mucha den e caminda corecto, pa e lanta cu integridad y cu hopi respet.
Amor ta demostra cu bo ta balora locual Dios a dunabo, y bo ta haci tur esfuerso pa e ta un bon persona.
Nos no ta bibando den e miho tempo, ta hopi trampa tin pa nos hubentud, e ladron ta bini pa horta mata y pa destrui, y tur hende cu sano huicio mester mira esey y stop di purba tapa solo cu un dede.
Caya no tin nada pa ofrece bo yiu, caya ta maldad, y caya berguensa, dolo y morto.
Como mayor bo tin tur e toolsnan cu Dios a duna bo pa lanta bo yiu den bon caminda.
Tur cos ta cuminsa na e testimonio cu bo mes ta duna den bo hogar.
E palabra ta zona fuerte pero ta lo siguiente: Un cas sin regla ta un cura di cabrito, pasobra ey den maldad y inmoralidad ta drenta, arma ta drenta y droga ta drenta,pasobra mayornan a tira serbete, nan ta ocupa den e palabra moderno, nan tin dos trabao, nan ta den paranda, nan den gym ta cuida curpa, nan ta gosa bida , mientras cu yiunan ta bayendo cu high speed den scuridad.
Nan tin asina tanto excuus cu ta duro pa hala nan atencion como mayor.
E plan di diabel ta pa pone mayornan cu cara na berguensa, pa nan sinti nan mes fracasa como mayor, y afecta nan salud , cu dolor y tristesa. Pa stroba nan pa cumpli cu e mandato cu Dios a duna nan.
Mayor awor a keda na bo mes,tuma bo decision.
Sinceramente, Pastor Marcel Balootje
