Durante e actividadnan oficial despues di instalacion di Keiko Fujimori como Presidente di Republica di Peru, Prome Minister Mike Eman a tene un encuentro breve cu e diputado nobo di region La Libertad, Geanmarco Antonio Quezada Castro. E encuentro a tuma luga durante e recorido protocolar di Congreso di Republica pa Palacio di Gobierno. E mandatario y dignatarionan internacional a acompaña Presidente Fujimori durante su caminata pa e siguiente parti di e ceremonia di cambio di mando. Diputado Quezada a saluda Prome Minister Eman hunto cu embahador di Reino Hulandes Alexander Kofman. Asina a logra establece un contacto politico internacional cu Aruba. E intencion tey pa intercambio habri posibilidad pa explora cooperacion y intercambio di experiencia entre Aruba y region La Libertad.
Retonan cu Aruba y La Libertad tin den comun
La Libertad ta un region importante den parti pa nort di Peru, cu Trujillo como su capital. E region tin un economia cu ta inclui agricultura, comercio, industria y turismo, pero ta enfrenta tambe diferente reto social y ambiental. Entre e retonan tin siguridad, prevencion pa fenomeno El Niño y erosion di nan beachnan. E ultimo problema ta afecta diferente parti di La Libertad y por tin consecuencia pa e comunidadnan, infrastructura y actividad turistico. Aruba, como isla cu un sector turistico desaroya, tin experiencia den maneho di destino, proteccion di su producto turistico y promocion internacional. E realidad di ambos teritorio por crea espacio pa intercambio di conocemento riba turismo sostenibel, maneho di beachnan y proteccion di e recursonan natural. E encuentro entre Prome Minister Eman y diputado Quezada no tabata un reunion formal, pero a establece un prome contacto cu por sigui desaroya den futuro.
Ken ta Geanmarco Quezada?
Geanmarco Antonio Quezada Castro ta abogado y politico Peruano. E a nace dia 8 di mei 1977 na Trujillo, den region La Libertad. Durante su trayectoria profesional, Quezada a traha como asesor legal y asesor den Congreso di Republica. Den eleccion regional di 2018, e tabata candidato pa Gobernador di La Libertad pa e partido di e recien instala presidente di Peru Keiko Fujimor, esta e partido Fuerza Popular. Den eleccion di 2026, Quezada a wordo eligi como diputado di region La Libertad pa periodo 2026-2031.
Despues di su eleccion, Quezada a indica cu e kier promove un agenda comun pa desaroyo di La Libertad. Entre su prioridadnan tin recuperacion di siguridad, reactivacion economico, prevencion di efecto causa pa fenomeno El Niño y mehoracion di cuido medico, educacion y miho maneho di uzo di recurso natural manera awa.
E diputado ta considera cu e diferente fraccion politico mester busca consenso riba e temanan cu ta afecta calidad di bida di pueblo Peruano.
Contacto directo cu Latino America
Pa Aruba e encuentro cu Quezada ta forma parti di e contactonan durante bishita di Prome Minister Mike Eman na Peru. E presencia di Aruba na Lima a ofrece un oportunidad pa fortalece e relacionnan existente y establece lasonan nobo cu representante di diferente pais y region. E contacto cu diputado Quezada ta mustra con Aruba por comparti su experencia como pais den area di turismo, siguridad, sostenibilidad y maneho di beach. Na mes momento, Aruba por explora oportunidad economico y comercial cu e regionnan dinamico di Peru manera La Libertad.
