Pa parlamentario Eduard Pieters di Partido Patriotico Arubano (PPA), e cuestion principal den e debate rond di e suma di 16 miyon florin di Aruba Tourism Authority (ATA), ta e splicacion cla y transparente di su destino. Durante entrevista na Enfoke 90, Pieters a enfoca su critica riba e 16 miyon florin reserva den e Corporate Plan & Budget 2026 di ATA bou di e rubrica “Government Development.” Segun e parlamentario, Gobierno ainda no a splica claramente na Parlamento ni na pueblo con lo uza e placa ey.
No a crea ATA pa bira un banco di Gobierno
Segun Pieters, ATA tabata crea cu un mision specifico: fortalece e producto turistico di Aruba. Pa e motibo ey, e parlamentario ta cuestiona si e institucion ta desviando di su proposito original, ora ta reserva miyones di florin pa e proyectonan cu, tradicionalmente, ta responsabilidad di diferente ministerio. “Unda e limite ta?” Pieters a puntra.
Pa ilustra su preocupacion, e lider di fraccion di PPA a uza varios ehempel hipotetico. Segun Pieters, si e logica actual ta acepta, mañan ATA por termina financiando asfaltamento di caminda, renobacion di e scolnan, cuido di adulto mayor of otro proyecto gubernamental.
“Tur esakinan ta importante,” el a bisa, “pero ningun di nan ta e mision original di ATA.”
Segun Pieters, e preocupacion no ta solamente financiero. E berdadero riesgo ta institucional. “Nos ta cambiando e proposito di un institucion publico sin Parlamento haya e debate corespondiente. Si ta e rumbo aki Aruba kier cana, anto mester hsci cambio na leynan existente pa tur he de ta riba un mesun liña.”
Carta formal na Conseho di Minister
PPA tambe a confirma cu a manda un carta formal na Conseho di Minister pidiendo documentacion completo tocante e base legal, e proceso sigui y e decisionnan cu a conduci na e uzo di e fondo di 16 miyon florin. Segun Pieters, e peticion no tin como obhetivo pa crea confrontacion politico, sino duna Gobierno oportunidad pa demostra cu tur decision ta tuma conforme ley. “Nos no ta busca show. Nos ta duna Gobierno oportunidad pa coregi e situacion.”
E parlamentario a enfatisa cu Parlamento tin un deber constitucional pa controla con ta uza placa publico. Pa Pieters, e funcion di e oposicion no ta obstaculisa Gobierno, sino verifica si e maneho financiero ta transparente y conforme cu e marco legal. Pieters a adverti cu e debate aki no ta limita na un solo contrato. Segun Pieters, e decisionnan cu tuma awe, por crea precedente pa futuro, si Parlamento no cuestiona uzo di e fondonan publico.
“Cada florin cu ATA maneha ta placa di Aruba,” el a conclui. “Pueblo tin derecho di sa, unda e placa ta bay, kico e ta financia y con ta tuma e decisionnan aki.”
Pa PPA, transparencia no ta un opcion, sino un obligacion. Y mientras Gobierno no duna claridad riba e destino di e 16 miyon florin, Pieters ta bisa cu Parlamento tin e responsabilidad di sigui haci e preguntanan cu pueblo tambe kier haya contesta.
