Capitan Glen Andrew, un yiu di tera cu a nace na Aruba na 1976, a logra construi un carera impresionante den aviacion internacional. Despues di gradua di Colegio Arubano na 1997, Glenroy a sigui su estudio na Embry-Riddle Aeronautical University na Daytona Beach, Florida, unda cu el a gradua cu e titulo Aeronautical Science na aña 2000.
Na 2003 el a cuminsa su carera profesional cu Republic Airways, un di e companianan di aviacion regional mas grandi den Estados Unidos, cu ta opera buelonan pa American Airlines, Delta Air Lines y United Airlines. Cu dedicacion, disciplina y hopi trabou duro, Glenroy a sigui progresa den su profesion te ora cu na 2021 el a bira Capitan na American Airlines.
Aunke Capitan Andrew a bula e ruta entre Miami y Aruba den pasado caba como capitan, e vuelo di ayera 3 Augustus, vuelo AA2217, tabata diferente. No pa motibo cu tabata su prome biaha cu e la aterisa na Aruba como capitan, sino pasobra tabata e prome biaha cu su mayornan lo tabata pasahero riba un avion cu nan propio yiu ta pilotando.
Esaki ta un momento cu tin un significado hopi profundo pa e famia Andrew. Sr. Gifton y Sra. Myra Andrew, di San Nicolas, a traha duro pa duna nan yiu e oportunidad di sigui su estudio y sigui su soño di bira piloto. Awe, despues di hopi aña di sacrificio, nan a por sinta riba e mes avion cu nan yiu ta na mando como capitan.
Capitan Andrew ta hiba su mayornan pa Miami, unda cu nan lo reuni cu otro miembronan di famia pa celebra e cumpleaño di 80 aña di su tata riba 5 di Augustus. Segun famia y amigonan, esaki tabata un soño cu Sr. Gifton Andrew tabatin pa hopi aña: un dia por bula cu su yiu como piloto di e avion. Ayera, e soño aki a bira realidad.
Interesante cu, apesar di su exito den aviacion, Capitan Glen Andrew semper a keda un persona humilde. E nunca a busca reconocemento pa su logronan y poco hende sa cu Aruba ta un di e destinacionnan cu el ta bula regularmente. Precisamente pa motibo di su humildad, tabata dificil pa organiza un momento especial pa reconoce su exito.
E historia di Glen Andrew ta un inspiracion pa hopi hoben Arubiano. Su trayecto ta demostra cu dedicacion, perseverancia y determinacion, soñonan por bira realidad. Pero mas cu tur, e ta mustra e balor di famia, di sacrificio y di nunca lubida di unda bo a bini.
Aruba por sinti su mes orguyoso di un otro Yiu di Tera cu ta representa nos isla cu excelencia riba escenario internacional y cu su historia ta inspira e siguiente generacion pa sigui nan soñonan sin miedo.
