E esfuerso pa revitalisa Bernhardstraat na San Nicolas ta sigui conta cu sosten di mas hende y organisacionnan cu ta dicidi di pone man na obra. Diasabra, entre e boluntarionan cu a participa den e trabou di verf tabata Jean Irvens Georges, di origen Haitiano pero cria na Aruba, y un grupo di Youth With A Mission Aruba, representa pa Erik de Kievit. Pa varios siman caba, Prome Minister Mike Eman hunto cu boluntarionan ta dedica diasabra mainta te cu merdia na verf casnan y contribui na un cara mas nechi pa Bernhardstraat. E iniciativa ta sigui crece cu hendenan cu, cada un for di su propio motivacion, ta dicidi di aporta nan tempo y energia.
Jean Irvens Georges a conta cu el a tende di e iniciativa via su tata, kende a cont’e cu Prome Minister Mike Eman ta verf casnan na San Nicolas pa yuda pone e area mas nechi. Su reaccion tabata cu si el por yuda, anto el lo bin yuda. Jean, kende ta di origen Haitiano pero a crece na Aruba, a splica cu el ta sinti Aruba como su tera y ta considera importante pa tambe aporta na su cuido. El a conta cu despues di bishita otro islanan y mira con comunidadnan ta cuida nan ambiente, el a pensa cu esey tambe ta algo cu por fortalece aki na Aruba. Pa Jean, no ta suficiente pa solamente aprecia un ambiente nechi. Si nos kier mira cambio, nos mes tambe mester aporta. “Si no ta nos, ken lo haci’e?” Jean a expresa, alentando residentenan pa tambe participa den e esfuerso. Segun dje, tin casnan cu pa añanan no a haya un capa di verf y e trabou actual ta duna nan un oportunidad pa haya un cara nobo.
E diasabra aki tabata tambe e prome biaha cu varios boluntario di Youth With A Mission Aruba a participa directamente den e trabou di verf na Bernhardstraat. Erik de Kievit a splica cu e organisacion ta forma parti di un movimiento mundial y cu na Aruba nan ta coopera principalmente cu otro organisacio n y iglesia pa fortalece e famianan. Youth With A Mission no ta desconoci cu San Nicolas. Erik a indica cu nan ta participa regularmente hunto cu otro den distribucion di alimento den e area. Nan tin tambe un grupo di boluntarionan femenino cu ta brinda atencion na muhenan cu ta traha den prostitucion na San Nicolas. Segun Erik, participacion den e proyecto di Bernhardstraat ta conecta directamente cu e mision di nan organisacion di comparti amor y sostene e famianan. “Nos por contribui na loke ta wordo haci aki, pa duna e hendenan y famianan cu ta biba aki un cara nobo na nan cas,” Erik a splica. Un aspecto special di e participacion di Youth With A Mission ta cu varios di e boluntarionan actualmente tin vakantie. Toch, nan mes a propone pa dedica parti di nan tempo liber pa bin yuda verf.
Nan a expresa cu nan kier bin yuda “pa haci diferencia”, segun Erik. Pa e organisacion, e intencion ta pa sigui participa den futuro ora capacidad permiti, specialmente ora nan ricibi ekiponan of famianan cu ta bin Aruba pa haci trabou boluntario.
E participacion di Jean Irvens Georges y e boluntarionan di Youth With A Mission Aruba ta mustra e fuersa di boluntarismo den practica. E historianan aki ta agrega un otro dimension na e esfuerso: un hende di origen Haitiano, cria na Aruba, un grupo di Hulandes Europeo cu ta sinti responsabilidad pa aporta na nos comunidad caminda nan ta yama cas.
E revitalisacion di Bernhardstraat ta sigui asina cas pa cas, cu cada man extra haciendo diferencia y cu comunidad mes tomando un rol activo den cuido y mehoramento di su ambiente.
