Palabra di Dios ta bisa; ken cu bisa e seru aki: Sea kita for di eynan,y tira den laman y no duda den sy curason, ma kere cu e ta bay sosode, esey lo wordo haci pe.
Sin Fe ta imposibel agrada Dios, tur locual cu nos pidi cu fe, y kere cu nos ta ricibi nos lo ricibi.
Nos Fe ta traha pa nos hasta ora nos ta na sonjo, pasobra anochi nos ta pidi cu Fe y mainta nos ta mira con nos Fe den Cristo Hesus a move pa nos.
Fe ta sinja nos kere sin mira, pasobra hopi biaha nos ta haci oracion cu Fe, pa un persona of un situacion cu nos no ta mira,of un operacion dificil, y pa motibo cu nos ta kere y nos tin Fe den Dios cu Dios hacie e ta sosode.
Tur cos ta posibel si bo tin fe, fe ta poderoso, fe ta move mannan di Dios, fe ta alcansa caminda hende no por alcansa.
Riba tur cos un hende mester realisa cu den su amistadnan mester tin homber y muhernan di Fe.
Ta basta di rondona nos mes cu hendenan emocional, cu curason amarga, hende nan cu no ta pordona tampoco lubida.
Ta hopi bunita si nos por uni den un grupo di amigonan di Fe, no hende cu ta kere den idolatria, pero hende cu a kere den nan curason y confesa cu nan boca cu Hesus Cristo ta Senjor, y cu ta biba segun boluntad, y ta perservera den oracion, pa bienestar di comunidad.
Pasobra door di e gracia duna na mi,mi ta bisa cada un di boso,pa no pensa mas halto di su mes, cu e mester pensa, ma pa mas bien, pensa di su mes cu sano huicio, di acuerdo cu e midi di Fe cu Dios a duna bo.( Romanonan 12:3).
Dios a duna nos tur un midi di fe, cual ora nos kere den Dios, Dios ta mira e confiansa y dependencia cu nos tin den dj’E, y pa medio di Su compasion y misericordia E ta haci milager den nos bida.
Fe semper ta move den boluntad di Dios, pasobra Fe ta move man di Dios.
Fe cu maldad no ta uni, pasobra hende no por haci malo, y tin fe cu locual cu nan a haci nunca lo sali na cla.
Nos Fe ta aumenta dia pa dia ora cu mas nos realisa, cu tur locual Dios a priminti e ta capas di cumpli cune.
Y ora e Fe ey ta activo den nos, egoismo. jaloers, envidia, lo no tin lugar den nos curason, pasobra nos no ta desea cos di otro hende, pasobra nos sa ken nos Dios ta.
Laga nos tene firme na e confesion di nos speransa, pasobra Esun cu a primiti ta fiel. ( Hebreonan 10:23).
Pasobra e palabra di Dios ta bibo y activo, y mas scherpi cu spada di dos filo, y ta penetra te na division di alma y spirito, y di scharnier di tuti,y ta capas pa husga pensamentonan,y intencion di curason.
Ora nos pone nos asunto den man di Dios, ta nifica seguridad, beneficio, y bondad, pasobra no tin ningun man, mas Poderoso cu e man di Dios.
E man di Dios ta activo tur caminda, e ta move den silencio. E ta move den publico y tambe den priva, e ta habri caminda, y mas cu tur cos e ta trece pas y trankidad den nos curason.
Awe ta un bon dia pa bo kere y realisa, con grandi Dios ta.
Sinceramente, Pastor Marcel Balootje
