Segun Maduro, e declaracion di Minister Croes cu Aruba no tin placa pa inversion no ta cuadra cu e propio cifranan oficial di Gobierno. E Uitvoeringsrapportages di cuarto kwartaal di 2023, 2024 y 2025 ta mustra cu Gobierno a presupuesta un suma considerabel pa inversion, pero no a logra ehecuta un gran parti di dje. “E problema principal no ta cu Aruba no tin placa presupuesta pa inversion. E problema ta cu Gobierno no ta logra prepara y ehecuta e proyectonan,” Maduro a declara.
Mas cu Afl. 105 miyon no ehecuta
E cifranan oficial saca di e Uitvoeringsrapportages oficial di Gobierno di cuarto kwartaal 2023, 2024 y 2025, ta mustra lo siguiente:
- Den 2023 tabata tin Afl. 51,6 miyon presupuesta pa inversion. Di esaki, Afl. 43,3 miyon a wordo realisa, esta 83,9%.
- Den 2024 tabata tin Afl. 66,1 miyon presupuesta, pero solamente Afl. 13,8 miyon a wordo realisa. Esaki ta apenas 20,9%.
- Den 2025 Gobierno a presupuesta Afl. 74,5 miyon pa inversion, mientras cu e realisacion tabata Afl. 30 miyon, alrededor di 40%.
Entre 2023 y 2025 Gobierno a presupuesta un total di Afl. 192,2 miyon pa inversion. Di e suma ey, solamente Afl. 87,1 miyon a wordo realisa of registra como realisacion. Pues mas di Afl.105 miyon cu Gobierno mes a presupuesta pa inversion no a wordo ehecuta.
“Minister Croes mester splica e contradiccion aki. Con e por conclui cu Aruba no tin placa pa inversion, mientras Gobierno no ta logra ehecuta e inversionnan cu ya a inclui den su propio presupuesto?” Maduro ta puntra.
HOFA no ta drecha falta di ehecucion
Segun Parlamentario Maduro, e cifranan ta indica cu Aruba tin un problema serio di planificacion, preparacion di proyecto, capacidad administrativo, coordinacion y liderato.
HOFA lo por facilita acceso na financiamento, pero HOFA no por prepara proyecto pa Gobierno, no por obliga ministerionan pa ehecuta nan presupuesto y no por drecha e falta di capacidad, planificacion y responsabilidad politico.
“Si Gobierno no por ehecuta e inversionnan cu ya ta presupuesta, mas placa presta no ta automaticamente bira mas inversion. E riesgo ta cu e bira solamente mas debe cu Pueblo di Aruba mester paga,” Maduro a enfatisa.
Un prestamo no ta un regalo. Cada florin cu Gobierno fia mester wordo paga bek, cu interes, pa medio di entrada di Gobierno y, finalmente, door di Pueblo. P’esey no ta responsabel pa uza e necesidad di inversion como argumento emocional pa introduci mas debe, sin prome mustra cu Gobierno tin e capacidad pa prepara, ehecuta y controla e proyectonan.
Minister ta manipula e discusion
Maduro ta considera e presentacion di Minister Croes incompleto y manipulativo, pasobra e ta presenta falta di financiamento manera cu esey ta e unico problema, mientras e ta laga afo e falta evidente di ehecucion bisto den e propio documentonan di Gobierno. “Bo no por bisa Pueblo cu no tin placa, sin conta Pueblo cu mas cu Afl. 105 miyon di inversion presupuesta no a wordo ehecuta. Esaki ta laga un parti esencial di e realidad afo pa crea e impresion cu HOFA ta e unico solucion,” Maduro a bisa.
Prome cu Minister Croes sigui presenta HOFA como e solucion pa inversion na Aruba, e mester duna cuenta di:
- Dicon mas cu Afl. 105 miyon di inversion presupuesta entre 2023 y 2025 no a wordo realisa;
- Cua proyectonan no a wordo ehecuta y pakico;
- Cua ta e obstaculonan administrativo cu a causa e atraso;
- Con Gobierno lo mehora su capacidad pa prepara y ehecuta proyecto;
- Y con Gobierno lo evita cu placa presta bira solamente mas debe pa Pueblo paga.
Bon gobernacion prome cu mas debe
Aruba definitivamente mester sigui inverti den infrastructura, scol, salubridad, siguridad, vivienda y desaroyo economico. Pero inversion responsabel ta cuminsa cu proyectonan bon prepara, un administracion cu por ehecuta nan y un Gobierno cu ta duna cuenta di e resultado.
“HOFA no por drecha falta di ehecucion. Bon gobernacion, capacidad administrativo, transparencia y responsabilidad si por,” Maduro ta conclui.
