Fraccion di MEP a haci pregunta por escrito na e Minister di Infrastructura, Sr. Herdé, tocante e decision di Gobierno pa extende e ROPV te 2029. Pa MEP, e manera con e decision a wordo tuma ta genera preocupacion serio. Parlamento di Aruba no a wordo informa prome y a haya sa di e decision via prensa.
E decision ta trata un asunto cu tin impacto directo riba e futuro di Aruba: vivienda, disponibilidad di tereno, desaroyo economico, diversificacion di nos economia y energia sostenible.
“Con ta posibel cu un decision asina importante ta wordo tuma sin informa Parlamento? Parlamento ta e representante di pueblo. E pueblo tin derecho di sa con y pakico Gobierno ta tuma decisionnan cu ta determina con nos ta uza e espacio limita di Aruba,” lider di fraccion di MEP Evelyn Wever-Croes a declara.
Promesa di gobierno tabata: adapta ROPV. Awor ta extension te 2029.
E situacion ta bira ainda mas preocupante pasobra varios Minister anteriormente a informa e Parlamento cu ROPV mester wordo adapta.
E necesidad pa modifica ROPV tabata wordo relaciona, entre otro, cu:
• e crisis di vivienda y falta di tereno pa construi cas;
• e necesidad pa haci diversificacion economico posibel;
• e desaroyo di energia sostenible;
• y e posibilidad pa realisa un parke di molina di biento nobo.
“Nos a tende di Gobierno cu ROPV mester wordo cambia pa por resolve precisamente e problema nan aki cu Aruba ta enfrenta. Awor, sin un debate publico of parlamentario, Gobierno ta extende e mesun regla nan te 2029. E pregunta ta simpel: con esaki ta compatibel cu e promesanan cu a wordo haci na Parlamento?”
Ken a a conseha Gobierno?
MEP ta pidi claridad tocante e proceso cu a conduci na e decision. E fraccion kier sa cual departamentonan y ministerionan a duna conseho tocante e extension, y a pidi copia di e consehonan.
“Si e decision ta basa riba bon conseho tecnico y huridico, no tin ningun motibo pa tene esaki secreto. Nos ta pidi transparencia. Parlamento mester por controla con un decision di tal importancia a wordo prepara y fundamenta.”
Mientras tanto, e problema di vivienda ta crece
Segun MEP, e extension di ROPV no por wordo mira separa di e crisis di vivienda y e escasez di tereno di erfpacht. E fraccion a pidi minister informacion tocante:
Cuanto solicitud pa tereno di erfpacht pa vivienda a wordo entrega na 2025? Cuanto a wordo trata? Y cuanto ta ainda warda?
MEP ta pidi specificamente un lista di e solicitudnan di 2025 cu te ainda no a wordo trata, incluyendo fecha di solicitud y e status actual di cada caso. Tambe a pidi pa e atraso existente na DIP y cua ta e medidanan concreto cu Gobierno ta tuma pa elimina e atraso.
Integridad ta esencial
Pa MEP, transparencia ta specialmente importante ora ta trata di otorgamento di tereno publico, cambionan den ordenacion teritorial y decisionnan cu por tin impacto economico grandi. P’esey e fraccion ta puntra tambe cua medida e minister ta tuma pa garantisa integridad y evita conflicto di interes, faboritismo of corupcion den e procesonan.
“Tereno publico ta propiedad di pueblo. Decisionnan tocante tereno no por wordo tuma den secreto. Nos mester tin reglanan cla, criterionan obhetivo y un proceso transparente y controlabel. E historia di Aruba a siña nos cu esaki no ta un luho sino un necesidad.”
“Nos no ta contra un bon decision. Nos ta contra un decision di gran impacto cu aparentemente a wordo tuma sin un debate transparente y cu Parlamento ta haya sa via prensa. Gobierno mester duna cuenta na Parlamento, no solamente despues cu un decision ya a wordo tuma.”
MEP ta spera di e Minister di Infrastructura un contesta completo dentro di 3 siman, incluyendo e documentonan cu a fundamenta e decision, y un planning concreto tocante e futuro di ROPV.
“Aruba no por warda te 2029 pa resolve e problemanan cu nos ta enfrenta awe. E falta di tereno, diversificacion economico y transicion energetico ta problemanan urgente di awe. Gobierno mester mustra cual ta e solucion y cual ta e planning.”
