Despues di mas di un aña di entrenamento intensivo, desaroyo profesional y crecemento personal, 16 recluta di e programa di Miembro di Tripulacion Hubenil di Wardacosta (JBK) di aña 2025 a completa nan entrenamento exitosamente. E graduadonan ta representa Aruba, Corsou y Sint Maarten, incluyendo reclutanan for di Saba y Sint Eustatius.
E grupo aki ta marca un hito significante pa Wardacosta di Caribe Hulandes. Pa prome biaha, un persona for di Sint Eustatius a completa e programa di Miembro di Tripulacion Hubenil di Wardacosta exitosamente. Mas notabel ainda, e prome graduado di JBK for di Sint Eustatius ta un muhe, marcando un logro historico tanto pa Sint Eustatius como pa Wardacosta.
E miho graduado di JBK e aña aki ta un hoben muhe di Aruba.
E programa di JBK ta prepara e reclutanan pa e responsabilidadnan diverso y exigencia di servicio den Wardacosta. Hunto cu entrenamento maritimo y proceduranan di abordahe, e programa a inclui prome auxilio, tiramento cu arma di candela, desaroyo fisico y mental, y entrenamento den mantencion di orden huridico realisa den colaboracion cu Opleidingsinstituut Rechtshandhaving & Veiligheidszorg (ORV). E reclutanan a wordo entrena den derecho penal, procedura penal, redaccion di proces-verbal, proceduranan di aresto y defensa propio. E experticio y compromiso di ORV ta haci un contribucion importante na e preparacion profesional di e futuro miembronan di Wardacosta.
E reclutanan tambe a adkiri experiencia practico pa medio di entrenamento y pasantia rond di diferente isla y abordo di e barkunan cutter di Wardacosta. E programa Stronger Together na inicio di nan entrenamento a establece e fundeshi pa e balornan cu a keda central durante henter e programa: siña, crece, supera reto y apoya otro.
Cu finalisacion di nan programa di JBK, e 16 graduadonan lo wordo promovi pa e rango di Marinero di Prome Clase (Able Seaman) dentro di Wardacosta. Awo nan ta cuminsa un capitulo nobo, poniendo nan conocemento y habilidadnan den practica pa yuda proteha y sirbi e comunidadnan na costa y riba lama.
Wardacosta di Caribe Hulandes ta extende su aprecio na e personal di instruccion di JBK, tur departamento y unidad participante, Base Naval Suffisant pa hospeda e reclutanan, y specialmente na ORV pa su cooperacion balioso y su contribucion significante na e programa di entrenamento. E colaboracion entre Wardacosta y ORV a sigui crece mas fuerte den e ultimo añanan. E graduadonan un biaha mas lo ricibi un diploma conhunto reconoci di JBK, resaltando e importancia di e cooperacion aki.
Wardacosta ta felicita tur 16 graduado riba e logro significante aki y ta desea nan un carera sigur, exitoso y yen di satisfaccion.
Stronger Together.
