Fundacion Ultimo Deseo Aruba (FUDA) tin un noticia sumamente special pa comparti: Grupo di Betico, un di e gruponan musical folklorico Arubano mas conoci y stima, a uni como grupo na FUDA y ta bira di e manera aki embahador oficial di FUDA.
Ta trata di un colaboracion hopi particular, pasobra FUDA no ta yama bonbini na solamente un embahador nobo, sino na un grupo completo cu diesseis embahador.
E embahadornan nobo ta:
Gos Oduber, Jouel Croes, Maikito Croes, Miguel Genser, Dennis Rasmijn, Rudney Lopez, Hemmy Croes, Michael Croes, Papa Maiky Croes, Dennis Oduber, Dino Luidens, Angelo Kock, Ofo Croes, Jaderick Croes, Jeremy Bonarriba y Rendell Silva.
Nan ta un pida for di e curason di Aruba.
Grupo di Betico a wordo funda nada menos cu cincuentishete aƱa pasa door di Betico Croes y a nace for di e bunita tradicion Arubano di fin di aƱa: e Dande.
E grupo ta toca y canta musica tradicional Arubano, pero ta conoci tambe pa skirbi y presenta composicionnan nobo y contemporaneo di Aruba. Tanto na Aruba como durante presentacionnan den exterior, Grupo di Betico sa con pa uni hende y haci di cada presentacion un fiesta grandi.
Netamente e conexion fuerte ey cu e cultura y e comunidad Arubano ta haci e colaboracion aki cu FUDA algo hopi special.
FUDA ta dedica su mes na personanan na Aruba cu ta terminalmente malo y/of postra na cama y cu ta depende di transporte di ambulance. E fundacion ta haci posibel pa cumpli cu nan ultimo deseonan totalmente gratis.
Pa por yuda mas tanto hende posibel, ta esencial pa cada habitante di Aruba sa kico FUDA ta haci y sa cu e fundacion ta eynan pa nan.
Renate Raven, Presidente di Fundacion Ultimo Deseo Aruba (FUDA), a declara: “Nos ta increiblemente orguyoso y nos ta sinti nos sumamente honra cu Grupo di Betico a uni su mes como grupo na FUDA. Esaki ta pa nos hopi mas cu un simpel papel di embahador. Grupo di Betico ta representa un pida bunita di nos pais. Nan musica, nan historia y nan conexion cu e hendenan riba nos isla lo yuda nos haci FUDA conoci cerca hopi mas persona.”
Pa medio di e colaboracion aki, FUDA y Grupo di Betico ta spera di por amplia e reconocemento di e nomber di FUDA y yega na mas hende na Aruba.
Pasobra mas hende sa cu e fundacion ta existi, mas deseo por wordo cumpli.
FUDA ta yama Grupo di Betico un caluroso bonbini como embahadornan nobo.
Raven a agrega: “Nos ta profundamente agradecido pa e confianza cu Grupo di Betico tin den FUDA y pa nan disposicion pa haci un esfuerso conhunto pa nos fundacion y nos grupo meta. Nos ta sumamente entusiasma pa logra cosnan bunita hunto pa e hendenan aki na Aruba.”
Cu e cooperacion special aki, FUDA kier demostra cu hunto nos por nifica algo grandi: ningun persona mester entrega su (ultimo) deseo simplemente pasobra e mester di transporte di ambulance.
Fundacion Ultimo Deseo Aruba (FUDA) ta un fundacion cu ta traha pa personanan terminal y/of postra na cama cu ta depende di transporte di ambulance y cu ainda kier cumpli cu un deseo.
FUDA ta realisa e deseonan aki completamente gratis y ta depende totalmente di donacion, sponsor, boluntario y e sosten di e comunidad Arubano.
Pa mas informacion y desaroyo por sigui FUDA riba Facebook: Fundashon Ultimo Deseo Aruba, y tambe por sigui Grupo di Betico riba Facebook.
