Parlamentario di AVP ing. Carlos Bermudez ta cuestiona fuertemente e postura cu oposicion, y particularmente parlamentarionan di MEP Dangui Oduber y Hendrik Tevreden, ta tuma ayera como supuesto defensor di tour guides y operadornan di UTV y ATV. Segun Bermudez, documentonan oficial ta demostra cu, durante administracion anterior, ta precisamente Gobierno di MEP/RAIZ a diseña y aproba un plan pa elimina e actividadnan aki completamente pa aña 2030.
Bermudez a presenta documentonan di 2021 den cual lider di MEP, Evelyn Wever-Croes, a describi e tournan como un “problema”, “desordo”, “peliger” y “molester”. E plan di coalicion MEP/RAIZ tabata contempla un prohibicion di importacion di vehiculonan UTV y ATV, paralisa otorgamento di vergunning comercial nobo y finalmente elimina e tipo di operacion aki.
Ademas, e gobierno anterior tabata desea forma un Task Force cu participacion, entre otro, di Ministerio Publico y Cuerpo Policial Arubano. Segun Bermudez, esaki ta demostra un intencion firme pa trata y hasta criminalisa actividadnan di tour guides, en bes di busca un solucion conhuntamente cu e sector.
“Tur esaki a wordo dicidi sin invita e sector pa un dialogo serio, sin sinta cu e tour guides y operadornan pa comprende nan realidad y busca solucionnan hunto. P’esey ta sumamente falso pa awe parlamentario di MEP bisa cu nan lo lucha banda di e mesun operadornan cu nan gobierno tabata prepara pa elimina,” Bermudez a declara.
Parlamentario Bermudez tambe a señala un documento aproba door di Conseho di Minister dia 19 di september 2024, apenas algun luna prome cu eleccion. E documento ta stipula cu solamente tres ruta lo keda disponibel, como parti di un proceso cu lo conduci na eliminacion total di e operacionnan pa 2030.
Bermudez ta cuestiona con Dangui Oduber, kende tabata Minister di Turismo durante e administracion anterior, por presenta su mes awe como aliado di e tour guides, mientras cu bou di su responsabilidad ministerial gobierno a permiti diseño y aprobacion di e plan aki.
“Mi ta lamenta cu, den nan desesperacion, tour guides a acepta sosten cerca politiconan di oposicion, mientras cu ta nan mes a hinca tur e plan aki den otro. Oduber y Tevreden mester duna cuenta di nan propio decisionnan prome cu nan pretende cu nan ta lucha pa e sector,” Bermudez a expresa.
Segun e parlamentario di AVP, un solucion sostenibel por wordo haya solamente door di dialogo directo y transparente. Esaki mester tuma luga na mesa cu representantenan di gobierno, parlamento, sector turistico, organisacionnan ambiental y, mas importante ainda, e propio tour guides y operadornan.
“No por sigui dicidi tras di porta cera, solamente cu minister cu ta sostene postura di Aruba Birdlife Conservation, sin un representacion cu ta para pa turismo y economia, y cu algun hefe di departamento publico. E hendenan cu nan pan ta depende di e actividad aki mester forma parti di e combersacion,” Bermudez a enfatisa.
Bermudez ta agrega cu e caso, manera cu e ta, no ta limita su alcance solamente na UTV y ATV, sino tabata papia di vehiculonan motorisa en general. Esaki por a inclui bus, van, jeep y hasta auto familiar, afectando no solamente tour guides, sino potencialmente henter comunidad.
Parlamentario Carlos Bermudez ta reitera cu proteccion di naturalesa y desaroyo turistico no mester ta enemigonan di otro. Sinembargo, pa logra un balansa realistico, gobierno ta papia cu e sector, establece regla cla, y busca solucionnan cu ta proteha tanto naturalesa como trabou y entrada di famianan Arubano.
Bermudez ta satisfecho cu gobierno a pidi pa pospone e caso entama door di Aruba Birdlife Conservation caminda Huez ta pidi e stakeholders pa bin na mesa y ta spera cu e organisacion lo sa haci caso di esey tambe pa beneficio di e propio naturaleza, cientos di famia den e sector aki y e bienestar di e isla en general.
LEYENDA POTRET:
Parlamentario Bermudez hunto cu otro colega di fraccion durante e reunion cu a sostene cu representantenan di tour operators dia 25 di augustus ultimo den sala di fraccion AVP na Parlamento di Aruba.
