No tin nada mas bunita, ora nos relacion cu Dios ta bon, y ora nos relacion cu nos rumannan tambe ta cana bon, pasobra esey ta e boluntad di Dios pa nos bida.
Si nos bisa cu nos ta stima Dios, y mientras tanto nos curason ta yen di odio y rencor warda contra nos prohimo, nos bida ta for di balansa, nos mester pordona nos ruman pa nos tin pas cu Dios.
Hasta mal pensamento ta kita nos pas cu Dios, pasobra mal pensamento ta pica.
Tur locual ta pica ta kita nos pas cu Dios. Pasobra pica ta kibra nos comunicacion cu Dios.
Hopi biaha hende ta nervioso, dolor di cabes, stress etc, ta simplemente pasobra no tin pas cu Dios y mente ta ocupa den cosnan di mundo.
Inmoralidad, idolatria, bruheria, malicia, envidia, amargura, orguyo, rabia,mal pensamento, e obranan di carni ( Galationan 5:19-21) tur ta cosnan cu ta stroba nos pas cu Dios, y tin nan consecuencia pa nos bida.
Pesey e palabra di Dios ta bisa den Romanonan 12:2 : No sea conforme e mundo aki,ma sea transforma pa medio di renobamento di boso mente, pa boso por comproba kico ta e bon,y agradabel y perfecto boluntad di Dios.
Mas ainda locual e Palabra di Dios ta bisa nos den Colosensenan 3:1-3: Si boso a wordo lanta cu Cristo anto, sigi busca e cosnan di ariba, caminda Cristo ta sinta na man drechi di Dios, Pone boso mente riba e cosnan di ariba, no riba e cosnan riba tera.Pasobra boso a muri y boso bida ta scondi den Cristo den Dios,
Pesey for di den testament bieu , ta para scirbi den Isaias 43:18-19 pa nos no bay bek den pasado, y cu Dios ta bay haci cosnan nobo Tambe 2 Corintionan 5:17 ta bisa cu si un hende bini na Cristo, criatura nobo y tur cos bieu a pasa y a wordo haci nobo.
Ora un hende kier dilanti e no por ta mara na cosnan bieu cu a pasa den su bida, pasobra nos no por haci nada na nos pasado, ayera a pasa caba, lanta ariba awe y pone bo bista riba Cristo Hesus kende ta nos unico y suficiente Salbador.
Un hende cu cada rato ta trece bo pasado bo dilanti, ta un hende cu a keda pega den tempo, of e no kier mira abo crece, y hopi biaha esey tin di haber cu envidia, pasobra e no kier mira y acepta e cambio y bendicion di Dios den bo bida, e tin dolor pa celebra bo victoria.
Laga e pas di Cristo goberna boso curason, pa cual boso a wordo yama den un curpa,y sea agradecido.
( Colosensenan 3:15).
E pas di Dios ta masha importante, pasobra e ta mantene nos mente riba cosnan bon , berdadero y puro ( Filipensenan 4:8-9).cosnan cu berdaderamente ta duna crecemento spiritual, y ta hiba nos na intimidad cu Dios.
Awor cu e Senjor di pas mes continuamente duna boso pas den tur circumstancia, Senjor sea cu boso tur .( 2 Thesalonisensenan 3:16).
Stima esnan cu ta odiabo, esnan cu ta papia malo di bo, esnan cu envidia ta kibra nan curason, haci oracion pa nan, pa Dios toca nan curason, y hala nan riba e caminda di Dios.
Pasobra no tin ningun clase di ganashi ora hende ta paga malo cu malo.
E sirbido di Senjor Dios, no mester ta pleitado, ma carinjoso cu tur hende. ( 2 Timoteo 2:24).
No tin nada mas bunita, ora bo curason y bo cas ta yena cu pas di Dios.
Sinceramente, Pastor Marcel Balootje
